سنجاوی,ضلعی انتظامیہ کا پوست کی کاشت کے خلاف بڑا کریک ڈان، 60 ایکڑ فصل تباہ

کوئٹہ(یو این اے )ڈپٹی کمشنر ضلع زیارت عبدالقدوس اچکزئی کی خصوصی ہدایات پر اسسٹنٹ کمشنر سنجاوی شیر شاہ غلزئی نے پوست (افیون) کی کاشت کے خلاف تحصیل سنجاوی میں ایک جامع اور کامیاب آپریشن کیا ہے۔ اس کارروائی کے دوران ایس ایچ او تھانہ سنجاوی سجاد احمد کی سربراہی میں پولیس کی بھاری نفری نے سیکیورٹی کے سخت انتظامات سنبھالے ہوئے تھے۔تفصیلات کے مطابق آپریشن کے دوران مختلف علاقوں میں تقریبا 60 ایکڑ اراضی پر کھڑی پوست کی فصل کو مکمل طور پر تباہ کر دیا گیا۔ اس کے علاوہ کاشتکاری کے لیے استعمال ہونے والے سولر پینلز، پائپ لائنز اور بجلی کی ترسیل کے دیگر آلات کو بھی قبضے میں لے کر نظام کو ختم کر دیا گیا۔ ضلعی انتظامیہ کے مطابق تحصیل سنجاوی میں یہ ساتواں کامیاب آپریشن ہے، جس کا مقصد ضلع سے منشیات کی پیداوار کا خاتمہ کرنا ہے۔ انتظامیہ نے واضح کیا ہے کہ ضلع زیارت میں پوست کی کاشت کے حوالے سے زیرو ٹالرنس پالیسی اپنائی گئی ہے اور غیر قانونی سرگرمیوں میں ملوث عناصر کے خلاف بلا امتیاز کارروائی جاری رہے گی۔