خضدار،میر غوث بخش بزنجو اسٹیڈیم میں 15 اپریل سے آل سندھ بلوچستان فٹبال ٹورنامنٹ کا آغاز

خضدار (یو این اے )خضدار کے تاریخی بابائے بلوچستان میر غوث بخش بزنجو اسٹیڈیم میں 15 اپریل سے آل سندھ بلوچستان فٹبال ٹورنامنٹ کا انعقاد کیا جا رہا ہے، جسے علاقے میں کھیلوں کی بحالی اور نوجوانوں کے لیے ایک خوش آئند پیش رفت قرار دیا جا رہا ہے۔ طویل عرصے بعد منعقد ہونے والا یہ بین الصوبائی ایونٹ نہ صرف کھلاڑیوں کو اپنی صلاحیتیں دکھانے کا موقع فراہم کرے گا بلکہ شہر میں صحت مند تفریح کے فروغ کا باعث بھی بنے گا۔اس شاندار ایونٹ کا سہرا نیشنل پارٹی خضدار کے ضلعی صدر رئیس بشیر احمد مینگل اور ان کی ٹیم کے سر ہے، جن کی انتھک محنت اور کھیلوں سے وابستگی کی بدولت یہ ٹورنامنٹ ممکن ہو سکا ہے۔ رئیس بشیر احمد مینگل، جو کھیلوں کے میدان میں وسیع تجربہ رکھتے ہیں، ہمیشہ سے نوجوانوں کو مثبت سرگرمیوں کی جانب راغب کرنے میں پیش پیش رہے ہیں۔ عوامی حلقوں نے ان کے اس اقدام کو سراہتے ہوئے کہا ہے کہ اس طرح کے مقابلوں سے سندھ اور بلوچستان کے کھلاڑیوں کے درمیان بھائی چارے اور یکجہتی کو فروغ ملے گا۔امید ظاہر کی جا رہی ہے کہ اس ٹورنامنٹ کے انعقاد سے خضدار کی سرزمین پر کھیلوں کی سرگرمیوں میں تیزی آئے گی اور نوجوان نسل کو تعمیری ماحول میسر آئے گا۔ انتظامیہ کی جانب سے ایونٹ کی تیاریاں زور و شور سے جاری ہیں تاکہ شائقین فٹبال کو بہترین مقابلے دیکھنے کو ملیں اور خضدار کا نام کھیلوں کے میدان میں مزید روشن ہو۔