بلوچستان ہائی کورٹ کا پولیس حراست میں نوجوان کی ہلاکت پر سخت نوٹس، اعلی افسران طلب

کوئٹہ(یو این اے )کوئٹہ میں پولیس حراست کے دوران ایک نوجوان کی مبینہ ہلاکت کے معاملے پر بلوچستان ہائی کورٹ نے سخت نوٹس لیتے ہوئے اعلی پولیس حکام کو طلب کر لیا ہے۔ چیف جسٹس بلوچستان ہائی کورٹ جسٹس جناب محمد کامران خان ملاخیل اور جسٹس جناب محمد نجم الدین مینگل پر مشتمل دو رکنی بینچ نے سی پی نمبر 444/2026 کی سماعت کی۔ سماعت کے دوران درخواست گزار نے مقف اختیار کیا کہ ان کے بیٹے حافظ اسرار احمد کو ایگل اسکواڈ نے گرفتار کیا تھا، تاہم چھ دن بعد پولیس نے اطلاع دی کہ نوجوان نے لاک اپ میں مبینہ طور پر خودکشی کر لی ہے، جبکہ حقیقت میں یہ ایک مشکوک واقعہ ہے اور بی ایم سی کے ڈاکٹر نے بھی موت کو "غیر فطری” قرار دیا ہے۔عدالت نے کیس کی حساسیت کو مدنظر رکھتے ہوئے ایڈووکیٹ جنرل آفس کو جامع رپورٹ پیش کرنے کی ہدایت کی اور ایس پی سریاب، ایس ایچ او کیچی بیگ اور ایس ایچ او نیو سریاب کو آئندہ سماعت پر ذاتی حیثیت میں پیش ہونے کا حکم دیا ہے۔ عدالت نے واضح کیا کہ کسی قسم کی کوتاہی یا عدم تعاون برداشت نہیں کیا جائے گا، جبکہ سیشن جج سریاب اور جوڈیشل مجسٹریٹ-II سے بھی علیحدہ رپورٹس طلب کی گئی ہیں۔ عدالتی بینچ نے انسپکشن برانچ کو فوری کارروائی کی ہدایت دیتے ہوئے کہا کہ معاملے کی ہر پہلو سے چھان بین کی جائے تاکہ حقائق سامنے آ سکیں۔ کیس کی مزید سماعت 21 اپریل تک ملتوی کر دی گئی ہے۔