حکومت بلوچستان نے کفایت شعاری اور ایندھن کے استعمال میں کمی کے اقدامات نافذ کرنے کا فیصلہ

کوئٹہ (آن لائن) حکومت بلوچستان نے موجودہ عالمی اور علاقائی صورتحال کے پیش نظر کفایت شعاری اور ایندھن کے استعمال میں کمی کے اقدامات نافذ کرنے کا فیصلہ کیا ہے۔چیف منسٹر سیکرٹریٹ بلوچستان کی جانب سے باقاعدہ آفس آرڈر جاری کر دیا گیا ہے جس کے مطابق سرکاری دفاتر میں کام کرنے والے افسران کی سرکاری گاڑیوں کے لیے ایندھن کی فراہمی میں پچاس فیصد کمی کر دی گئی ہے۔ جبکہ وہ افسران یا اہلکار جو گھروں سے کام کر رہے ہیں، انہیں فی الحال سرکاری گاڑیوں کے لیے ایندھن کی فراہمی بند کر دی گئی ہے۔آفس آرڈر میں مزید کہا گیا ہے کہ سرکاری دفاتر میں جنریٹرز صرف انتہائی ہنگامی صورتحال میں چلانے کی اجازت ہوگی۔ اس کے علاوہ پول گاڑیوں کے استعمال میں بھی پچاس فیصد کمی کر دی گئی ہے اور ان گاڑیوں کو بھی صرف ہنگامی حالات میں استعمال کیا جا سکے گا۔حکام کے مطابق ان اقدامات کا مقصد سرکاری اخراجات میں کمی اور ایندھن کی بچت کو یقینی بنانا ہے۔