برطانوی وزیر دفاع کا جنگ کے خاتمے پر زور، فوجی حل سے گریز کی حمایت

 برطانوی وزیر دفاع جان ہیلی نے کہا ہے کہ وہ جنگ ختم کرنے کے امریکی منصوبے کی تفصیلات سے آگاہ نہیں ہیں، تاہم برطانیہ خطے میں کشیدگی کم کرنے کے لیے سفارتی کوششیں جاری رکھے ہوئے ہے۔

جان ہیلی کے مطابق آبنائے ہرمز کی صورتحال کے پیش نظر تمام متعلقہ ممالک کو ایک پلیٹ فارم پر لانے کی کوشش کی جا رہی ہے تاکہ مشترکہ حکمت عملی کے ذریعے بحران کا حل نکالا جا سکے۔

انہوں نے زور دیا کہ موجودہ حالات میں ایسا حل تلاش کرنا ضروری ہے جس میں عسکری قوت شامل نہ ہو۔

برطانوی وزیر دفاع کا کہنا تھا کہ خطے میں پائیدار استحکام کے لیے تنازع کا پرامن حل ناگزیر ہے اور اس مقصد کے لیے سفارتی ذرائع کو ترجیح دی جا رہی ہے۔

انہوں نے کہا کہ عالمی برادری کو مل کر ایسے اقدامات کرنے ہوں گے جو کشیدگی میں کمی اور امن کے قیام میں مددگار ثابت ہوں۔

ماہرین کے مطابق برطانیہ کا یہ مؤقف خطے میں بڑھتی ہوئی کشیدگی کے تناظر میں اہم پیش رفت ہے، جو ممکنہ طور پر سفارتی حل کی راہ ہموار کر سکتا ہے۔