قلات ڈویژن میں عوامی ٹرانسپورٹ پر عائد مکمل پابندی جزوی طور پر ختم

کوئٹہ ( آئی این پی ) محکمہ داخلہ بلوچستان کے معاون بابر خان یوسفزئی نے اعلان کیا ہے کہ عوامی مشکلات کے پیش نظر قلات ڈویژن میں عوامی ٹرانسپورٹ پر عائد مکمل پابندی کو جزوی طور پر ختم کر دیا گیا ہے۔صوبائی وزیر داخلہ میر ضیا لانگو اور ایڈیشنل چیف سیکرٹری داخلہ حمزہ شفقات کی ہدایت پر اب بین الضلعی بسیں، ویگن اور کوچز محدود اور ضابطہ شدہ انداز میں چل سکیں گی، جبکہ روٹس اور اوقات کار کا تعین ضلعی انتظامیہ کرے گی۔حکام کے مطابق سکیورٹی اقدامات پر سختی سے عملدرآمد کیا جائے گا اور قانون نافذ کرنے والے ادارے نگرانی یقینی بنائیں گے۔ عوام سے ہدایت کی گئی ہے کہ وہ حفاظتی اصولوں اور انتظامیہ کی ہدایات پر عمل کریں۔