ضلع کوئٹہ کے لوکل گورنمنٹ کی حلقہ بندیاں مردم شماری کے مطابق کی گئی ‘الیکشن کمیشن

کوئٹہ:الیکشن کمیشن بلوچستان کے ترجمان نے کہا ہے کہ ضلع کوئٹہ کے لوکل گورنمنٹ کی حلقہ بندیاں آخری مردم شماری کے اعداد و شمار اور آبادی کے کوٹہ کو مد نظر رکھتے ہوئے کی گئی ہیں الیکشن کمیشن بلوچستان کے ترجمان نے اس اخباری خبر کی سختی سے تردید کی ہے جس میں الزام لگایا گیا ہے کہ الیکشن کمیشن نے لوکل گورنمنٹ کی حلقہ بندیاں کسی مخصوص گروپ کے لیے ترتیب دی ہیں۔ترجمان نے اس تاثر کو مکمل رد کرتے ہوئے کہا ہے کہ یہ حلقہ بندیاں آخری مردم شماری کے اعداد و شمار کی بنیاد پر آبادی کے کوٹہ کو مد نظر رکھتے ہوئے کی گئی ہیں جس کے لئے باقاعدہ ایک کمیٹی تشکیل دی گئی تھی جس نے تمام قوانین اور زمینی حقائق کو ملحوظ خاطر رکھتے ہوئے ابتدائی فہرست جاری کی ہے۔ اس حوالے سے اگر کسی بھی مقامی ووٹر کو ان حلقہ بندیوں پر اعتراض ہے تو وہ الیکشن کمیشن آف پاکستان کی جانب سے مقرر کردہ حلقہ بندی اتھارٹی کو اپنے اعتراضات 29 اپریل 2026 تک داخل کروا سکتے ہیں جن پر بعدازاں باقاعدہ شنوائی ،قانون کے مطابق فیصلے کئے جائیں گے اور اس کے بعد حتمی حلقہ بندیوں کی فہرست کو شائع کیا جائے گا۔ ترجمان الیکشن کمیشن نے مزید کہا ہے کہ بے بنیاد اخباری بیانات کے ذریعے حلقہ بندیوں کے اس قانونی عمل پر تنقید کی بجائے قانون میں دئیے گئے طریقہ کار کے مطابق مجاز اتھارٹی کے پاس بمعہ ٹھوس وجوہات اعتراض داخل کئے جائیں تاکہ ان کی باقاعدہ شنوائی اور فیصلے ہو سکیں۔