وفاقی حکومت کے پہلے دو ماہ میں بیرونی قرضوں میں 23 فیصد اضافہ

اقتصادی امور کی رپورٹ کے مطابق رواں مالی سال جولائی سے اگست کے دوران پاکستان نے ایک ارب 70 کروڑ ڈالر کی بیرونی مالی معاونت حاصل کی، جبکہ گزشتہ مالی سال کے اسی عرصے میں ایک ارب 37 کروڑ ڈالر کی بیرونی معاونت ملی تھی۔

رپورٹ کے مطابق رواں مالی سال کے پہلے دو ماہ میں حاصل کردہ بیرونی قرض 476 ارب روپے کے مساوی رہا، جبکہ گزشتہ مالی سال جولائی سے اگست کے دوران 391 ارب روپے کے مساوی بیرونی قرض حاصل کیا گیا تھا۔

اقتصادی امور کے مطابق پہلے دو ماہ میں مختلف منصوبوں کے لیے 48 کروڑ 45 لاکھ ڈالر کا قرض حاصل ہوا، جبکہ نان پراجیکٹ مد میں ایک ارب 21 کروڑ ڈالر کی بیرونی معاونت ملی۔

رپورٹ کے مطابق عالمی مالیاتی اداروں نے پہلے دو ماہ کے دوران 59 کروڑ ڈالر سے زائد کا قرض فراہم کیا۔ اسلامی ترقیاتی بینک نے 19 کروڑ 12 لاکھ ڈالر، عالمی بینک نے 23 کروڑ 84 لاکھ ڈالر جبکہ ایشیائی ترقیاتی بینک نے 9 کروڑ 57 لاکھ ڈالر فراہم کیے۔

اقتصادی امور کی رپورٹ کے مطابق مختلف ممالک نے پاکستان کو 3 کروڑ 52 لاکھ ڈالر کی مالی معاونت فراہم کی، جس میں جرمنی کی جانب سے ایک کروڑ 28 لاکھ ڈالر اور سعودی عرب کی جانب سے 89 لاکھ ڈالر شامل ہیں۔

رپورٹ کے مطابق نیا پاکستان سرٹیفکیٹ کی مد میں 62 کروڑ 97 لاکھ ڈالر کا قرض حاصل کیا گیا، جبکہ غیر ملکی کمرشل بینکوں سے 30 کروڑ ڈالر قرض لیا گیا۔