معاشی مشکلات کے باوجود چیئرمین سینیٹ کیلیے 9 کروڑ روپے کی گاڑی خریدنے کا انکشاف

اسلام آباد: سرکاری خزانے سے چیئرمین سینیٹ سید یوسف رضا گیلانی کے لیے تقریباً 9 کروڑ روپے مالیت کی نئی گاڑی خریدنے کا انکشاف سامنے آیا ہے جس کے بعد اس معاملے پر سیاسی اور عوامی حلقوں میں بحث شروع ہو گئی ہے۔

 

نجی ٹی وی کی رپورٹ میں ذرائع کے حوالے سے بتایا گیا ہے کہ مہنگی گاڑی سینیٹ سیکریٹریٹ کو موصول ہو چکی ہے۔

 

اس حوالے سے جب چیئرمین سینیٹ سے سوال کیا گیا تو انہوں نے مہنگی گاڑی کی خریداری کی تصدیق کرتے ہوئے کہا کہ یہ گاڑی سینیٹ کے بجٹ سے حاصل کی گئی ہے۔ ان کا کہنا تھا کہ اس گاڑی کا آرڈر گزشتہ سال مئی میں دیا گیا تھا۔

 

چیئرمین سینیٹ کے مطابق گاڑی کی خریداری کے لیے گزشتہ مالی سال میں سینیٹ کے بجٹ میں ہونے والی بچت کو استعمال کیا گیا۔ انہوں نے وضاحت کی کہ بچ جانے والی رقم سے گاڑی کا آرڈر دیا گیا تھا جو اب سینیٹ سیکریٹریٹ کو فراہم کر دی گئی ہے۔

 

انہوں نے مزید بتایا کہ ملک کی موجودہ معاشی صورتحال کو مدنظر رکھتے ہوئے انہوں نے گاڑی واپس کرنے کی کوشش بھی کی تھی تاہم متعلقہ حکام نے آگاہ کیا کہ چونکہ گاڑی پہلے ہی فراہم کی جا چکی ہے اس لیے اسے واپس کرنا ممکن نہیں رہا۔

 

اس معاملے کے منظر عام پر آنے کے بعد سوشل اور سیاسی حلقوں میں اس پر مختلف آرا سامنے آ رہی ہیں۔ بعض حلقوں کا کہنا ہے کہ معاشی مشکلات کے دور میں سرکاری اخراجات میں احتیاط ضروری ہے جبکہ حکومتی مؤقف کے مطابق یہ خریداری سینیٹ کے بجٹ کے اندر رہتے ہوئے کی گئی۔

 

مبصرین کے مطابق اس معاملے نے ایک بار پھر حکومتی اخراجات، مالی نظم و ضبط اور عوامی وسائل کے استعمال سے متعلق بحث کو تیز کر دیا ہے۔ عوامی نمائندوں کے لیے سرکاری سہولیات اور اخراجات کے معیار پر بھی مختلف حلقوں میں گفتگو جاری ہے۔