دنیا کے معمر ترین شخص بننے کے منتظر 119 سالہ فرد کی طویل ترین زندگی کا راز جانیں

ایتھل کیٹرہم کو اس وقت دنیا کی معمر ترین شخصیت کا اعزاز حاصل ہے جن کی 117 ویں سالگرہ اگست میں ہوئی تھی۔

مگر کوسٹا ریکا سے تعلق رکھنے والے جوز فلورس کا دعویٰ ہے کہ ان کی عمر 119 سال ہے۔

Sardinal نامی قصبے سے تعلق رکھنے والے جوز فلورس کے خاندانی دستاویزات اور آفیشل ریکارڈ سے بھی یہی ثابت ہوتا ہے کہ ان کی عمر 119 سال ہے۔

اس طرح وہ اس وقت حیات دنیا کے معمر ترین فرد ہیں مگر یہ اعزاز اس وقت تک حاصل نہیں ہوسکتا جب تک بین الاقوامی سطح پر ماہرین حقائق کا تجزیہ کرکے تصدیق نہیں کردیتے۔

یہ قصبہ دنیا کے ان 5 بلیو زونز میں سے ایک ہے جہاں کے رہائشی عام طور پر طویل صحت مند زندگی گزارتے ہیں اور ان میں 100 سال کی عمر تک پہنچنے کا امکان زیادہ ہوتا ہے۔

اس قصبے کے باسی کیلشیئم اور میگنیشم سے بھرپور پانی، مکئی اور بیجوں پر مشتمل روزانہ کی غذا، جسمانی سرگرمیوں، خاندانی اور سماجی تعلقات کو لمبی عمر کا راز قرار دیتے ہیں۔

ان کی پوتی اور دیکھ بھال کرنے والی ہیلن فلورس کے مطابق اپنے روزگار کے برس دیہی علاقوں میں گزارنے والے جوز فلورس اب خوش باش زندگی گزار رہے ہیں۔

دنیا کے معمر ترین شخص بننے کے منتظر 119 سالہ فرد کی طویل ترین زندگی کا راز جانیں
جوز فلورس اور ان کی پوتی ہیلن فلورس / رائٹرز فوٹو
وہ اکثر اپنے ماضی کے واقعات سناتے ہیں، لطائف شیئر کرتے ہیں جبکہ خاندان کو اپنے طویل زندگی کا باعث قرار دیتے ہیں۔

ہیلن فلورس نے بتایا کہ ‘محبت، شفقت اور دیکھ بھال کے بغیر وہ ہمارے ساتھ نہیں ہوتے’۔

جوز فلورس کے شناختی کارڈ کے مطابق ان کی تاریخ پیدائش 11 جولائی 1907 ہے۔

ماہرین کے مطابق کسی فرد کی عمر کی تصدیق کا عمل کافی طویل ہوتا ہے جس کے لیے بہت زیادہ دستاویزات کی ضرورت ہوتی ہے، جب ہم جوز فلورس کے تمام دستاویزات کا معائنہ کرلیں گے تو توقع ہے کہ ان کی باضابطہ تصدیق ہو جائے گی اور ہم بہت جلد سب کو اچھی خبر سنائیں گے۔

ابھی جوز فلورس کا خاندان ماہرین کے فیصلے کا انتظار کررہا ہے اور ہیلن فورس کا ماننا ہے کہ یہ ان کے گھرانے سے ہٹ کر بھی اہمیت کا حامل ہے۔

انہوں نے کہا کہ ‘یہ خاندان اور ہمارے ملک دونوں کے لیے فخر کا باعث ہوگا’۔

8 بچوں کے والد جوز فلورس کے 23 پوتے پوتیاں، نواسے نواسیاں ہیں جبکہ 25 پڑپوتے، پڑپوتیاں اور ایک پوتے یا پوتی کی بیٹی خاندان کا حصہ ہے۔