رکھنی اور گردونواح میں زلزلے کے جھٹکے، شدت 4.8 ریکارڈ

رکھنی(یو این اے )ضلع بارکھان کی تحصیل رکھنی اور اس کے گردونواح میں زلزلے کے شدید جھٹکے محسوس کیے گئے ہیں، جس کے باعث شہریوں میں شدید خوف و ہراس پھیل گیا۔ زلزلہ پیما مرکز کے مطابق ریکٹر اسکیل پر زلزلے کی شدت 4.8 ریکارڈ کی گئی ہے۔ زلزلے کے جھٹکے محسوس ہوتے ہی لوگ خوفزدہ ہو کر اپنے گھروں اور دکانوں سے باہر کھلے مقامات پر نکل آئے۔رپورٹس کے مطابق رکھنی شہر کے ساتھ ساتھ ملحقہ دیہی علاقوں میں بھی زمین لرزنے کی اطلاعات موصول ہوئی ہیں۔ ابتدائی اطلاعات کے مطابق زلزلے کے نتیجے میں فی الحال کسی جانی یا مالی نقصان کی اطلاع نہیں ملی ہے، تاہم جھٹکے اتنے واضح تھے کہ شہریوں میں تشویش کی لہر دوڑ گئی۔ انتظامیہ اور متعلقہ ادارے صورتحال کا جائزہ لے رہے ہیں۔