روس اور یوکرین کے درمیان فضائی حملوں میں مختصر وقفے پر اتفاق
روسی صدارتی دفتر کریملن کے مطابق یہ اتفاق رائے امریکی صدر ڈونلڈ ٹرمپ کے خصوصی ایلچی اسٹیو وٹکوف اور جیرڈ کشنر کی صدر پیوٹن سے ملاقات کے دوران ہوا۔
دونوں امریکی ایلچیوں نے روسی صدر سے تقریباً تین گھنٹے طویل ملاقات کی، جس میں روس یوکرین جنگ کے خاتمے اور ممکنہ جنگ بندی سمیت مختلف امور پر تفصیلی بات چیت کی گئی۔
کریملن کے ترجمان کے مطابق ملاقات میں ہونے والے مذاکرات بامعنی اور تعمیری رہے۔ فریقین نے جنگ کے خاتمے کے لیے متعدد تجاویز پر غور کیا اور ممکنہ حل کے لیے کئی تجاویز مرتب کی گئی ہیں۔
روسی صدارتی دفتر کے مطابق امریکی ایلچیوں نے صدر پیوٹن کے مؤقف کو یوکرین کے ساتھ ہونے والے مذاکرات میں پیش کرنے کی یقین دہانی بھی کرائی ہے۔
دوسری جانب امریکی میڈیا نے دعویٰ کیا ہے کہ اسٹیو وٹکوف اور جیرڈ کشنر آج یوکرین کا دورہ کریں گے، جہاں وہ روسی مؤقف اور جنگ بندی سے متعلق تجاویز یوکرینی حکام کے سامنے رکھیں گے۔
روس اور یوکرین کے درمیان فضائی حملوں میں تین روزہ وقفے کا اعلان ایسے وقت میں سامنے آیا ہے جب دونوں ممالک کے درمیان جاری جنگ کے خاتمے کے لیے سفارتی کوششیں تیز کی جا رہی ہیں۔ تاہم، عارضی جنگ بندی کے بعد مستقل امن معاہدے کے امکانات کا انحصار آئندہ مذاکرات میں دونوں فریقوں کے مؤقف میں پیش رفت پر ہوگا۔