پی بی 36 قلات میں میر ضیا اللہ لانگو کی کامیابی برقرار

کوئٹہ(یو این اے )الیکشن کمیشن آف پاکستان نے بلوچستان اسمبلی کے حلقہ PB-36 قلات سے متعلق اہم محفوظ فیصلہ سناتے ہوئے صوبائی وزیر داخلہ میر ضیا اللہ لانگو کی کامیابی کو برقرار رکھنے کا حکم دے دیا ہے۔ الیکشن کمیشن نے مخالف امیدوار میر سعید لانگو کی جانب سے دائر کردہ انتخابی درخواست کو مسترد کرتے ہوئے سابقہ نتائج کو درست قرار دیا ہے۔ تفصیلات کے مطابق میر سعید لانگو نے انتخابی عمل میں بے ضابطگیوں کا الزام عائد کرتے ہوئے نتائج کو چیلنج کیا تھا اور دوبارہ جائزے کا مطالبہ کیا تھا۔الیکشن کمیشن میں گزشتہ کئی روز سے جاری سماعت کے دوران دونوں فریقین کے وکلا نے تفصیلی دلائل دیے۔ میر ضیا اللہ لانگو کی جانب سے سینئر ایڈووکیٹ نادر چھلگری نے قانونی نکات پیش کیے، جنہیں مدنظر رکھتے ہوئے کمیشن نے درخواست گزار کے اعتراضات کو ناکافی قرار دے کر خارج کر دیا۔ اس فیصلے کے بعد میر ضیا اللہ لانگو کی کامیابی پر اٹھنے والے سوالات دم توڑ گئے ہیں اور ان کے حامیوں میں خوشی کی لہر دوڑ گئی ہے۔ سیاسی مبصرین کے مطابق اس فیصلے سے صوبائی وزیر داخلہ کی سیاسی پوزیشن مزید مستحکم ہو گئی ہے۔ دوسری جانب درخواست گزار کی جانب سے تاحال کوئی باضابطہ ردعمل سامنے نہیں آیا۔