دفاع وطن کا مشن سر انجام دینے والے ٹیم کے ہر فرد کو سلام پیش کرتے ہیں ،نواب ثناءاللہ زہری

کوئٹہ(این این آئی)سابق وزیراعلیٰ بلوچستان و پاکستان پیپلز پارٹی کے رہنما نواب ثناءاللہ خان زہری نے وم تکبیر کے موقع پر پوری قوم کو مبارک باد پیش کرتے ہوئے کہا ہے کہ دفاع وطن کا مشن سر انجام دینے والے ٹیم کے ہر فرد کو سلام پیش کرتے ہیں پاکستان کے دفاع کو ناقابل تسخیر بنانے کے لیے جوہری پروگرام کا آغاز شہید ذوالفقار علی بھٹو نے شروع کیا تھا ۔یہاں جاری ہونے والے ایک بیان میں نواب ثناءاللہ خان زہری نے کہا کہ شہید ذوالفقار علی بھٹو نے تمام عالمی دباو¿ کو رد کر کے پاکستان کے ایٹمی پروگرام کے سفر کا آغاز کیا تھا محترمہ بے نظیر بھٹو نے اپنے دونوں ادوار میں جو ہری پروگرام پر ہر قسم کے دباو¿ کے باوجود کام جاری رکھا انہوں نے کہا کہ 28 مئی 1998 کو چاغی کے پہاڑ پر پاکستان نے ایٹمی دھماکہ کر کے بھارت کی تکبر اور غرور کو خاک میں ملا دیا ۔انہوں نے کہا کہ پاکستان کو پہلی ایٹمی طاقت بنانے والے اور اس پروگرام پر خون جگر دینے والے تمام اکابرین ماہرین سائنسدان سیاست دانوں اور پاکستانی قوم کوسلام پیش کرتے ہیں ۔انہوں نے کہا کہ یوم تکبیر پاکستانی قوم ہی نہیں عالم اسلام کیلئے فخر کا دن ہے ایٹمی پروگرام پاکستان کے مضبوط دفاع کی علامت ہے مضبوط دفاع کیلئے پاکستان ایٹمی طاقت بن گیا اب وقت آگیا ہے اقتصادی لحاظ سے ناقابل تسخیر معیشت بن جائے۔انہوں نے کہا کہ آج یوم تکبیر کے موقع پر ہمیں اتحاد ویکجہتی، محنت وہمت برداشت و رواداری کے عزم کا اعادہ کر نا ہے۔