حکومت بلوچستان کی امتحانی مراکز میں مرد افسران کے داخلے پرپاپندی

کوئٹہ : حکومت بلوچستان نے امتحانی مراکز میں مرد افسران کے داخلے پرپاپندی عائد کردی خواتین مراکز کی نگرانی صرف مجاز خواتین عملہ کرے گا۔جاری اعلامیے کے مطابق طالبات کے امتحانی مراکز میں کسی بھی صورت مرد افسران یا مانیٹرنگ کمیٹی کے مرد ارکان کو داخلے یا معائنے کی اجازت نہیں ہوگی۔ حکام نے واضح کیا ہے کہ خواتین امتحانی مراکز کی نگرانی صرف مجاز خواتین عملہ ہی انجام دے گا۔محکمہ کالجز نے ڈائریکٹر کالجز اور چیئرمین بی بی آئی ایس ای کو ہدایت کی ہے کہ وہ اس حکم پر سختی سے عملدرآمد یقینی بنائیں۔ اعلامیے میں خبردار کیا گیا ہے کہ ہدایات کی خلاف ورزی کرنے والوں کے خلاف متعلقہ قواعد و ضوابط کے تحت سخت تادیبی کارروائی عمل میں لائی جائے گی۔مزید کہا گیا ہے کہ تمام متعلقہ افسران اس سرکلر پر اس کی روح کے مطابق عمل کریں تاکہ امتحانی نظام کو شفاف، منظم اور باوقار انداز میں مکمل کیا جا سکے۔ حکومت بلوچستان کے محکمہ کالجز، ہائیر اینڈ ٹیکنیکل ایجوکیشن نے ایچ ایس ایس سی سالانہ امتحانات کے دوران مانیٹرنگ کے حوالے سے اہم احکامات جاری کر دیے ہیں۔ جن کا مقصد امتحانی عمل کو مزید شفاف اور باوقار بنانا ہے۔