بھارتی شو میں بولڈ لباس پہننے سے انکار کیا: ریما خان

پاکستان کی معروف اداکارہ ریما خان نے انکشاف کیا ہے کہ انہوں نے بھارت میں ہونے والے ایک ایوارڈ شو کے دوران بولڈ لباس پہننے سے انکار کر دیا تھا کیونکہ وہ وہاں پاکستان کی نمائندگی کر رہی تھیں۔

ایک پوڈکاسٹ میں گفتگو کرتے ہوئے ریما خان کا کہنا تھا کہ وہ اپنے لباس اور گفتگو پر خاص توجہ دیتی ہیں اور فنکاروں کو چاہیے کہ وہ اپنی زبان، کردار اور رویے پر بھی ذمہ داری کا مظاہرہ کریں کیونکہ لوگ انہیں فالو کرتے ہیں۔

انہوں نے موجودہ میڈیا اور سوشل میڈیا کلچر پر بات کرتے ہوئے کہا ہے کہ آج کل منفی خبروں اور تنازعات کو زیادہ اہمیت دی جاتی ہے جبکہ مثبت کاموں کو کم اجاگر کیا جاتا ہے۔

ریما خان نے مزید کہا کہ ہر شخص جنت کا خواہاں ہوتا ہے لیکن کوئی مرنا نہیں چاہتا، اگر واقعی جنت میں جانا ہے تو انسان کو دوسروں کے لیے آسانیاں پیدا کرنی چاہئیں۔

انہوں نے کہا کہ وہ اللہ کی بے شمار نعمتوں پر شکر گزار ہیں اور ان کے نزدیک اصل کامیابی عاجزی اور شکرگزاری میں ہے، زندگی مختصر ہے اور ہمیں اسے مثبت انداز میں گزارنا چاہیے۔