بلوچستان میں آسمانی بجلی گرنے سے 4 افراد جاں بحق
صوبائی ڈیزاسٹر مینجمنٹ اتھارٹی (پی ڈی ایم اے) کے مطابق بلوچستان کے سوراب، پشین اور قلعہ سیف اللہ اضلاع میں بارش کے دوران بجلی گرنے کے واقعات میں 4 افراد جاں بحق ہوگئے۔
تفصیلات کے مطابق بلوچستان کے دو درجن کے قریب اضلاع میں موسلادھار بارش ہوئی جبکہ کوئٹہ، پشین، مستونگ اور صوبے کے دیگر علاقوں میں آئندہ 48 گھنٹوں کے دوران مزید موسلادھار بارش کی پیشگوئی ہے۔
لیویز کے مطابق یہ ہلاکتیں آسمانی بجلی گرنے سے ہوئیں، مرنے والوں میں سوراب ضلع میں مارے گئے دو نوجوان بھی شامل ہیں۔ لیویز نے بتایا کہ لاشوں کو ڈسٹرکٹ ہیڈ کوارٹر ہسپتال لے جایا گیا۔
بلوچستان بھر میں طوفانی بارش نے صوبے کے مختلف علاقوں میں درجنوں کچے مکانات کو نقصان پہنچایا۔ مزید موسلا دھار بارش کی پیش گوئی کے ساتھ پی ڈی ایم اے نے صوبے بھر میں ہائی الرٹ جاری کر دیا۔