اسحاق ڈار کی بحیرۂ احمر میں حوثیوں کے حملے میں 3 پاکستانیوں کے جاں بحق ہونے کی تصدیق
اسحاق ڈار نے ریاض میں پاکستانی سفارتخانے کو متعلقہ حکام سے فوری رابطے کی ہدایت کر دی اور کہا کہ سفارتخانہ جاں بحق پاکستانیوں کی میتیں واپس لانے کیلئے تمام ضروری اقدامات کرے، زخمی پاکستانی شہری کو ہر ممکن معاونت فراہم کی جائے۔
وزیر خارجہ نے کہا کہ پاکستان بحیرۂ احمر میں پیش آنے والے واقعے کی صورتحال پر گہری نظر رکھے ہوئے ہے۔
واضح رہے کہ گزشتہ روز یمنی حکومت اور کوسٹ گارڈ ذرائع نے کہا تھا کہ بحیرۂ احمر میں باب المندب کے مقام پر حوثیوں نے کارگو جہاز پر حملہ کیا ہے، حملے میں کارگو جہاز کے ڈیک کو نشانہ بنایا گیا جس میں عملے کے 3 ارکان ہلاک ہوگئے۔
سماجی رابطے کی ویب سائٹ ایکس پر وزیر خارجہ اسحاق ڈار نے اپنے جاری بیان میں کہا کہ حملے میں 3 پاکستانی شہری جاں بحق اور ایک زخمی ہوا، انہوں نے جاں بحق پاکستانیوں کے اہل خانہ سے دلی تعزیت کا اظہار کیا۔
نائب وزیراعظم کا کہنا تھا کہ غیر جنگی کمرشل جہازوں پر حملے معصوم جانوں کو خطرے میں ڈالتے ہیں، ایسے حملے بین الاقوامی قوانین کی خلاف ورزی اور بحری جہاز رانی کیلئے سنگین خطرہ ہیں، پاکستان سعودی حکام اور یمن کی بین الاقوامی طور پر تسلیم شدہ حکومت سے رابطے میں ہے۔