حکومت کرکٹ کی بہتری کیلئے ہرممکن تعاون کرے گی، نگران وزیراعظم

نگران وزیراعظم انوار الحق کاکڑ نے کہا ہے کہ پاکستان کرکٹ کی بہتری کیلئے حکومت ہر ممکن تعاون کرے گی۔

ذرائع کے مطابق نگراں وزیراعظم سے پی سی بی مینجمنٹ کمیٹی کے سربراہ ذکا اشرف نے ملاقات کی اور پاکستان کرکٹ بورڈ کے انتظامی امور سے آگاہ کیا۔

ذکا اشرف نے وزیراعظم کو کرکٹ کی بہتری کیلئے اٹھائے گئے اقدامات، پاکستان سپر لیگ اور چیمپئنز ٹرافی کے انعقاد سمیت دیگر امور پر بریفنگ دی اور قومی کرکٹ ٹیم کی حالیہ پرفارمنس سے بھی آگاہ کیا گیا۔

 

دونوں شخصیات کے درمیان پاکستان کرکٹ بورڈ کے الیکشن پر بھی مشاورت ہوئی۔ نگران وزیراعظم نے بریفنگ پر اطمینان کا اظہار کیا اور ملک میں کرکٹ کی بہتری کیلئے ذکا اشرف کو مزید اقدامات کرنے کی ہدایت کی۔

نگران وزیراعظم انوار الحق کاکڑ نے کہا کہ کرکٹ ڈپلومیسی سے سفارتی تعلقات میں بہتری لائی جا سکتی ہے، حکومت پی ایس ایل کے شاندار انعقاد کیلئے ہر ممکن سہولیات فراہم کرے گی۔