سید حیدر شاہ کو اقوام متحدہ میں پاکستان کا مستقل مندوب مقرر کرنے کا فیصلہ

ذرائع کے مطابق سید حیدر شاہ اس وقت نیدرلینڈز میں پاکستان کے سفیر کے طور پر خدمات انجام دے رہے ہیں۔

سفارتی ذرائع کے مطابق سید حیدر شاہ اس سے قبل نیپال میں پاکستان کے سفیر اور بھارت میں ڈپٹی ہائی کمشنر بھی رہ چکے ہیں، انہوں نے 2002 سے 2006 تک نیویارک میں اقوام متحدہ کے لیے پاکستان کے مستقل مشن میں بھی خدمات انجام دیں۔

ذرائع کا کہنا ہے کہ اقوام متحدہ میں پاکستان کے مستقل مندوب کا عہدہ عاصم افتخار احمد کے سیکرٹری خارجہ مقرر ہونے کے بعد خالی ہوا تھا۔

سید حیدر شاہ مارچ 2025 میں نیدرلینڈز میں پاکستان کے سفیر تعینات ہوئے تھے، جبکہ وہ نومبر 2020 سے اکتوبر 2022 تک نیپال میں پاکستان کے سفیر کی حیثیت سے بھی فرائض انجام دے چکے ہیں۔

سفارتی امور کا وسیع تجربہ رکھنے والے سید حیدر شاہ کی اقوام متحدہ میں بطور مستقل مندوب تعیناتی سے متعلق فیصلہ ذرائع نے رپورٹ کیا ہے، اس حوالے سے باضابطہ سرکاری اعلان سامنے آنے پر تقرری کی حتمی حیثیت واضح ہوگی۔