امریکا اور پاکستان کےدرمیان دوطرفہ تجارت 8 ارب ڈالر سے تجاوز کرگئی: نیٹلی بیکر

نیٹلی بیکر نے نجی شعبے کی شراکت داری کے ذریعے روزگار کے مواقع پیدا کرنے، معاشی امکانات کو وسعت دینے اور دونوں ممالک کے درمیان مشترکہ خوشحالی کو فروغ دینے میں امریکی اختراع کے کردار پر بھی زور دیا۔

امریکی ناظم الامور کے مطابق گزشتہ دو دہائیوں سے زائد عرصے کے دوران امریکا پاکستانی مصنوعات کی سب سے بڑی برآمدی منڈی اور پاکستان میں سرمایہ کاری کے اہم ترین ذرائع میں شامل رہا ہے۔

نیٹلی بیکر نے اس عزم کا اعادہ کیا کہ امریکا پاکستان کے نجی شعبے، اختراع کاروں، یونیورسٹیوں اور حکومت کے ساتھ مل کر کام کرنے، تجارت و سرمایہ کاری کو وسعت دینے اور ایسی شراکت داریاں قائم کرنے کے لیے پُرعزم ہے جو صدر ٹرمپ کی انتظامیہ کی رہنمائی میں دونوں ممالک کے لیے پائیدار خوشحالی کے نتائج فراہم کرسکیں۔

امریکی ناظم الامور نیٹلی بیکر نے وزیراعلیٰ پنجاب مریم نواز شریف اور پنجاب کے مصنوعی ذہانت و خصوصی اقدامات کے مشیر علی ڈار سے ملاقاتیں بھی کیں۔