آبنائے ہرمز سے متعلق غلط معلومات پر مذاکرات فوری ختم ہوں گے: ٹرمپ کی دھمکی

امریکی صدر ڈونلڈ ٹرمپ نے کہا کہ آبنائے ہرمز سے متعلق غلط معلومات ملیں تو مذاکرات کو فوری ختم کردیئے جائیں گے۔

امریکی صدر ڈونلڈ ٹرمپ نے سوشل میڈیا پلیٹ فارم ٹروتھ سوشل پر اپنے بیان میں کہا ہے کہ ایران نے امریکا کو آگاہ کیا ہے کہ آبنائے ہرمز میں جہازوں سے نہ کوئی ٹول ٹیکس لیا جا رہا ہے اور نہ ہی انشورنس فیس وصول کی جا رہی ہے۔

انہوں نے خبردار کیا کہ اگر یہ معلومات غلط ثابت ہوئیں تو امریکا اور ایران کے درمیان جاری مذاکرات فوری طور پر ختم کر دیے جائیں گے۔

ڈونلڈ ٹرمپ نے مزید کہا کہ ایران کے بعض منجمد فنڈز مکمل طور پر امریکی کنٹرول میں ہیں اور ان فنڈز کو امریکی کسانوں کو ادائیگی کے لیے استعمال کیا جائے گا۔

ان کے مطابق ایران ان منجمد فنڈز کے ذریعے امریکا سے مکئی، گندم، سویابین اور دیگر غذائی اجناس خرید سکتا ہے۔

صدر ٹرمپ نے دعویٰ کیا کہ ایران کو خوراک کی شدید ضرورت ہے اور یہ خریداری صرف امریکا سے ہی کی جائے گی۔