محرم الحرام کے موقع پر کوئٹہ میں گرین اور پنک بس سروس دو روز کے لیے معطل

کوئٹہ: صوبائی دارالحکومت کوئٹہ میں محرم الحرام کے موقع پر سیکیورٹی انتظامات اور عزاداری کے جلوسوں کے پیش نظر گرین بس اور پنک بس سروس دو روز کے لیے معطل کرنے کا فیصلہ کیا گیا ہے۔ متعلقہ حکام کے مطابق 9 اور 10 محرم الحرام کو دونوں بس سروسز مکمل طور پر بند رہیں گی، جبکہ 27 جون سے ان کی معمول کے مطابق دوبارہ بحالی کر دی جائے گی۔ یو این اے کے مطابق محرم الحرام کے دوران شہر بھر میں سیکیورٹی کے غیر معمولی انتظامات کیے جا رہے ہیں اور مختلف علاقوں میں جلوسوں اور مجالس کے انعقاد کے باعث متعدد شاہراہوں اور سڑکوں پر ٹریفک کی آمدورفت محدود یا بند رہے گی۔ اسی تناظر میں شہریوں کی حفاظت اور ٹریفک کی روانی کو برقرار رکھنے کے لیے گرین اور پنک بس سروس کو عارضی طور پر دو روز کے لیے معطل کرنے کا فیصلہ کیا گیا ہے۔حکام کا کہنا ہے کہ بس سروس کی بندش کا مقصد عزاداروں، مسافروں اور ٹرانسپورٹ عملے کی حفاظت کو یقینی بنانا ہے، جبکہ محرم الحرام کے دوران نافذ کیے جانے والے سیکیورٹی پلان کے تحت حساس علاقوں میں پولیس، ایف سی اور دیگر قانون نافذ کرنے والے اداروں کی اضافی نفری تعینات کی جائے گی۔ گرین بس سروس کے ذریعے روزانہ ہزاروں شہری سفر کرتے ہیں، جبکہ پنک بس سروس خواتین کے لیے ایک خصوصی سفری سہولت کے طور پر متعارف کرائی گئی ہے، جس سے طالبات، ملازمت پیشہ خواتین اور دیگر مسافر مستفید ہو رہی ہیں۔ دو روزہ بندش کے باعث شہریوں کو متبادل ذرائع آمدورفت اختیار کرنا ہوں گے۔ متعلقہ حکام نے شہریوں سے اپیل کی ہے کہ وہ محرم الحرام کے دوران جاری ٹریفک پلان اور سیکیورٹی ہدایات پر عمل کریں، غیر ضروری سفر سے گریز کریں اور کسی بھی قسم کی دشواری سے بچنے کے لیے پیشگی سفری منصوبہ بندی کریں۔ اعلامیے کے مطابق 9 اور 10 محرم الحرام کے اختتام کے بعد گرین اور پنک بس سروس 27 جون سے دوبارہ معمول کے مطابق اپنے مقررہ روٹس پر چلنا شروع کر دے گی، جس کے بعد شہریوں کو سفری سہولیات کی فراہمی کا سلسلہ بحال ہو جائے گا۔