کراچی میں سمندری طوفان کے خطرات ٹل گئے، فاصلہ 230 کلومیٹر ہوگیا

محکمہ موسمیات نے شمال مشرقی بحیرہ عرب میں بننے والے سمندری طوفان اسنیٰ کے حوالے سے 7 واں الرٹ جاری کردیا۔

محکمہ موسمیات کے مطابق بلوچستان کے ساحلی مقام اورماڑہ سے طوفان کا فاصلہ 250 کلومیٹر جبکہ گوادر سے 440 کلومیٹر ہے۔ سمندری غیرمعمولی سرگرمی ابتداء میں مغرب/ شمال مغرب اور پھر مغرب/جنوب مغرب کی جانب بڑھنے کا امکان ہے۔

سندھ کے اضلاع دادو میں 31 اگست تک جبکہ بلوچستان کے حب، لسبیلہ، آواران، کیچ اور گوادر اضلاع میں ایک ستمبر تک بارش کا امکان ہے۔ شدید بارشوں سے مکران کے ساحلی علاقوں میں نشیبی علاقوں میں پانی جمع ہو سکتا ہے۔

محکمہ موسمیات کے مطابق 80 کلومیٹر فی گھنٹہ کی رفتار سے تیز ہواؤں کے ساتھ سمندر بہت زیادہ ناہموار رہنے کا امکان ہے جس کے باعث سندھ اور بلوچستان کے ماہی گیروں کو یکم ستمبر تک سمندر میں نہ جانے کی ہدایت کی گئی ہے۔

محکمہ موسمیات کا مزید کہنا ہے کہ پی ایم ڈی کا سائیکلون وارننگ سینٹر، کراچی اس کی قریب سے نگرانی کر رہا ہے۔