انٹرنیشنل اولمپک کمیٹی نے بیلاروس کے ایتھلیٹس پر سے پابندی ہٹانے کی سفارش کردی۔

انٹرنیشنل اولمپک کمیٹی (آئی او سی) نے اپنے بیان میں کہا کہ بین الاقوامی مقابلوں میں حصہ لینے والے بیلاروسی ایتھلیٹس کیلئے تمام پابندیاں ہٹادی جائیں۔

خبر ایجنسی کے مطابق آئی او سی نے یوکرین جنگ کے باعث 2022 سے روسی اور بیلاروسی ایتھلیٹس اور آفیشلز کے ایونٹس پر پابندی لگانے پر زور دیا تھا۔

بیلاروس کو روسی حملے کیلئے ایک اسٹیجنگ گراؤنڈ کے طور پر استعمال کیا جاتا تھا۔

آئی سی سی نے ٹی ٹوئنٹی کرکٹ ٹیموں کی سالانہ رینکنگ جاری کردی۔

انٹرنیشنل کرکٹ کونسل کی جانب سے جاری کردہ رینکنگ کے مطابق مردوں میں بھارت اور خواتین میں آسٹریلیا کی ٹیم بدستور نمبر ون ہے۔

مردوں کی رینکنگ میں بھارت کی برتری کم ہو کر 13 پوائنٹس رہ گئی ہے, انگلینڈ دوسرے اور آسٹریلیا تیسرے نمبر پر موجود ہے۔

نیوزی لینڈ چوتھی، جنوبی افریقا پانچویں، پاکستان چھٹی جبکہ ویسٹ انڈیز ساتویں پوزیشن پر موجود ہیں، بنگلادیش آٹھویں نمبر پر موجود ہے جبکہ سری لنکا تنزلی کے بعد نویں نمبر پر چلا گیا، افغانستان کی دسویں پوزیشن ہے۔

خواتین کی رینکنگ میں انگلینڈ دوسری اور بھارت تیسری پوزیشن پر موجود ہے۔ پاکستان کی خواتین ٹیم آٹھویں نمبر پر ہے۔

پاکستانی کرکٹر عثمان طارق نے انگلش کاؤنٹی ٹیم واروکشائر کے ساتھ معاہدہ کر لیا ہے، جس کے تحت وہ 2026 کے وٹالٹی بلاسٹ میں ٹیم کی نمائندگی کریں گے۔

واروکشائر کی جانب سے جاری اعلامیے کے مطابق عثمان طارق بطور غیر ملکی کھلاڑی ’واروکشائر بیئرز‘ اسکواڈ کا حصہ ہوں گے۔

اس موقع پر عثمان طارق نے خوشی کا اظہار کرتے ہوئے کہا کہ وہ واروکشائر کا حصہ بننے کے لیے بے حد پرجوش ہیں۔

واروکشائر ٹیم وٹالٹی بلاسٹ میں اپنا پہلا میچ 22 مئی کو کھیلے گی، جہاں عثمان طارق ایکشن میں نظر آئیں گے۔

مزید برآں، وٹالٹی بلاسٹ کے اختتام کے بعد عثمان طارق برمنگھم فینکس کی جانب سے دی ہنڈرڈ میں بھی شرکت کریں گے، جو ان کے کیریئر کے لیے ایک اہم پیش رفت تصور کی جا رہی ہے۔

آئی سی سی ویمن چیمپیئن شپ کے پہلے ایک روزہ میچ میں پاکستانی ویمن ٹیم نے زمبابوے کو جیت کیلئے 351 رنز کا ہدف دے دیا۔

نیشنل کرکٹ سٹیڈیم کراچی میں کھیلے جارہے میچ میں زمبابوے کی جانب سے دعوت پر پہلے بیٹنگ کرتے ہوئے پاکستان ویمنز ٹیم نے مقررہ 50 اوورز میں 5 وکٹوں کے نقصان پر 330 رنز بنائے۔

پاکستانی اوپنرز نے ٹیم کو 162 رنز کا مضبوط آغاز فراہم کیا، جہاں گل فیروزہ 50 رنز بنا کر آؤٹ ہوئیں۔ دوسری جانب اوپنر صدف شمس نے انتہائی ذمہ دارانہ بیٹنگ کا مظاہرہ کرتے ہوئے 130 گیندوں پر 98 رنز کی عمدہ اننگز کھیلی، تاہم وہ اپنی سنچری مکمل کرنے میں ناکام رہیں۔

مڈل آرڈر میں سدرا امین نے جارحانہ انداز اپنایا اور صرف 59 گیندوں پر 90 کے اسٹرائیک ریٹ سے 67 رنز جوڑے، اننگز کے آخری لمحات میں ناجیہ علوی نے دھواں دھار بیٹنگ کرتے ہوئے محض 30 گیندوں پر 56 رنز بنا کر اسکور بورڈ کو متحرک رکھا اور وہ ناٹ آؤٹ رہیں۔

عائشہ ظفر نے 3 اور عالیہ ریاض نے 2 رنز بنائے جبکہ کپتان فاطمہ ثنا 11 رنز کے ساتھ کریز پر موجود رہیں۔ پاکستان کی جانب سے اس بڑی اننگز میں 43 اضافی رنز بھی شامل تھے۔

زمبابوے کی جانب سے پریشس مارانگے سب سے کامیاب باؤلر رہیں جنہوں نے 10 اوورز میں 39 رنز دے کر 3 کھلاڑیوں کو پویلین کی راہ دکھائی۔ ان کے علاوہ کڈزئی چیگورا اور نومویلو سیبانڈا نے ایک ایک وکٹ حاصل کی۔

پاکستان کرکٹ بورڈ (پی سی بی) نے پاکستان سپر لیگ (پی ایس ایل) سیزن 11 کی ٹیم آف دی ٹورنامنٹ کا اعلان کر دیا ہے جس میں پشاور زلمی کے کپتان بابراعظم کو ٹیم کا کپتان مقرر کیا گیا۔

پی سی بی کے مطابق بابراعظم کو شاندار بیٹنگ اور بہترین قیادت کی بنیاد پر اس اعزاز سے نوازا گیا۔ انہوں نے پورے ٹورنامنٹ میں مسلسل عمدہ کارکردگی دکھائی اور اپنی ٹیم کو ٹائٹل جتوانے میں کلیدی کردار ادا کیا۔

پی ایس ایل 11 میں بابراعظم نہ صرف سب سے زیادہ رنز بنانے والے کھلاڑیوں میں شامل رہے بلکہ انہوں نے اپنی کپتانی میں پشاور زلمی کو چیمپئن بھی بنایا جو ان کے کیریئر کی ایک بڑی کامیابی تصور کی جا رہی ہے۔

ٹیم آف دی ٹورنامنٹ میں دیگر نمایاں کھلاڑیوں کو بھی شامل کیا گیا ہے جنہوں نے بیٹنگ، بولنگ اور آل راؤنڈ کارکردگی میں بہترین کھیل پیش کیا، تاہم قیادت کی ذمہ داری بابراعظم کو دی گئی ہے۔

ٹیم آف دی ٹورنامنٹ کے دیگر کھلاڑیوں میں فخر زمان ، کوشل منڈس، شان مسعود، عثمان خان، شاداب خان، حسن خان، شاہین آفریدی، حنین شاہ، صفیان مقیم ، رچرڈ گلیسن اور حسن نواز شامل ہیں۔

پی ایس ایل11 کی رنگا رنگ اختتامی تقریب میں ثقافتی رنگ بکھر گئے، گلوکاروں کی پرفارمنس پر شائقین جھوم اُٹھے۔

قذافی سٹیڈیم میں ہونے والی اختتامی تقریب نے پی ایس ایل 11 کو یادگار بنا دیا، شائقین کرکٹ کی بڑی تعداد اسٹیڈیم میں موجود رہی۔

سابق کپتان ظہیر عباس اوروسیم اکرم پی ایس ایل ٹرافی اسٹیج پر لے کر آئے اور پھر ٹرافی ایروبکس کا مظاہرہ کرتی خاتون نے وسیم اکرم کو دی۔

گلوکار علی عظمت، عاطف اسلم، آئمہ بیگ ، عارف لوہار اور دیگر نے اپنی آواز کا جادو جگایا تو شائقین ان کی پرفارمنس پر جھوم اٹھے، رنگارنگ اختتامی تقریب میں آتش بازی کا شاندار مظاہرہ کیا گیا۔

تنازعات کی زد میں رہنے والی انڈین پریمیئر لیگ میں ایک اور نیا تنازع سامنے آگیا۔ تفصیلات کے مطابق آئی پی ایل میں رائل چیلنجرز بینگلور اور گجرات ٹائٹنز کے درمیان ایک اہم میچ اس وقت تنازع کا شکار ہو گیا جب رجت پاٹیدار کے آؤٹ ہونے پر شدید ردعمل سامنے آیا۔ اس واقعے نے نہ صرف شائقین بلکہ ٹیم مینجمنٹ کو بھی حیران کر دیا۔ میچ کے اہم مرحلے میں پاٹیدار نے ایک شارٹ گیند پر پل شاٹ کھیلنے کی کوشش کی تاہم گیند بلے کا اوپری کنارہ لے کر ڈیپ اسکوائر لیگ کی جانب گئی جہاں جیسن ہولڈر نے کیچ مکمل کیا جبکہ اس دوران کگیسو ربادا بھی فائن لیگ سے دوڑتے ہوئے ان کے قریب پہنچ گئے تھے۔

کیچ کے واضح نہ ہونے کے باعث آن فیلڈ امپائرز نے فیصلہ تھرڈ امپائر کے سپرد کیا۔

ری پلے میں واضح طور پر نظر نہیں آیا کہ گیند زمین کو لگی یا نہیں اور شواہد کی کمی کے باوجود پاٹیدار کو آؤٹ قرار دے دیا گیا جس پر تنازع کھڑا ہو گیا۔

اس فیصلے پر ویرات کوہلی نے سخت ردعمل دیا اور باؤنڈری لائن کے قریب فورتھ امپائر سے بحث کرتے دکھائی دیے۔

بعد میں ہیڈ کوچ اینڈی فلاور بھی گفتگو میں شامل ہوئے اور دونوں نے فیصلے پر عدم اطمینان کا اظہار کیا۔

واضح رہے کہ یہ وکٹ ایسے وقت پر گری تھی جب ٹیم پہلے ہی دباؤ کا شکار تھی۔

تربت30اپریل۔ جشنِ بہاران کیچ فیسٹیول 2026 کے تحت گورنمنٹ بوائز ہائی اسکول چاہسر میں جاری بوائز سائیڈ کھیلوں کے مقابلے اختتام پذیر ہوگئے۔ اختتامی تقریب کے مہمانِ خصوصی ڈسٹرکٹ ایجوکیشن آفیسر کیچ امجد شہزاد تھے جنہوں نے نمایاں کارکردگی دکھانے والے کھلاڑیوں میں ٹرافیاں اور میڈلز تقسیم کیے۔ اس موقع پر اسپورٹس آفیسر غفار یوسف، حبیب دشتی، اے ڈی ای او تربت ممتاز لال، ڈاکٹر اصغر علی، ماسٹر محمد اقبال سمیت محکمہ تعلیم کے افسران اور اسکول اسٹاف موجود تھے۔اس موقع پر فٹبال کے فائنل میں گورنمنٹ ہائی اسکول کوشقلات اور گورنمنٹ ہائی اسکول آپسر کی ٹیموں کے درمیان سخت مقابلہ ہوا جس میں کوشقلات نے پنالٹی ککس پر کامیابی حاصل کرلی۔ 100 میٹر دوڑ می ہائی اسکول ابسر نے پہلی، چاہسر نے دوسری جبکہ جوسک نے تیسری پوزیشن حاصل کی۔میوزیکل چیئر مقابلے میں ہائی اسکول چاہسر پہلے،ہائی سکول کوشقلات دوسرے اور او پی ایف اسکول تربت تیسرے نمبر پر رہا جبکہ رسی کودنے (Rope Skipping) میں ہائی اسکول چاہسر نے پہلی او پی ایف اسکول تربت نے دوسری اور ہائی اسکول کوشقلات نے تیسری پوزیشن حاصل کی۔تقریب سے خطاب کرتے ہوئے ڈی ای او کیچ امجد شہزاد نے کہا کہ جشنِ بہاران کیچ فیسٹیول ایک اہم اور تاریخی اقدام ہے جس کے ذریعے طلبہ کو اپنی صلاحیتیں دکھانے کا موقع ملا۔ انہوں نے طلبہ پر زور دیا کہ وہ تعلیم کے ساتھ ساتھ اپنی جسمانی صحت پر بھی توجہ دیں۔ڈی ای او نے کہاکہ فیسٹیول میں اسکولوں کو شامل کرکے ڈپٹی کمشنر کیچ یاسر اقبال دشتی نے طلبہ کو اپنی صلاحیتوں کو نکھارنے اور سامنے لانے کا موقع دے کر علم دوستی پیش کی ہے۔ تقریب کے اختتام پر ڈی ای او کیچ امجد شہزاد، ہیڈماسٹر عبدالواحد اور دیگر مہمانوں نے کھلاڑیوں میں انعامات تقسیم کیے جبکہ شرکاءنے فیسٹیول کے انعقاد کو سراہا۔

پاکستان اور آسٹریلیا کے درمیان متوقع ون ڈے سیریز کے عارضی شیڈول کی تفصیلات سامنے آ گئی ہیں جس کے مطابق آسٹریلیا کی ٹیم رواں سال مئی کے آخر میں پاکستان کا دورہ کرے گی۔

میڈیا رپورٹس کے مطابق تین میچز پر مشتمل ون ڈے سیریز 30 مئی سے 5 جون کے درمیان کھیلے جانے کا امکان ہے جبکہ میچز لاہور اور راولپنڈی میں منعقد کیے جائیں گے۔

ذرائع کا کہنا ہے کہ یہ سیریز پاکستان کرکٹ بورڈ اور کرکٹ آسٹریلیا کے باہمی معاہدے کا حصہ ہے جس کے تحت آسٹریلوی ٹیم اس سے قبل بھی پاکستان کا دورہ کر چکی ہے۔

رپورٹس کے مطابق سیریز کے بعد آسٹریلوی ٹیم بنگلا دیش روانہ ہوگی جہاں وہ مزید ون ڈے میچز کھیلے گی جبکہ دونوں بورڈز کے درمیان شیڈول کو حتمی شکل دینے کا عمل جاری ہے۔

یہ سیریز دونوں ٹیموں کے لیے اہم سمجھی جا رہی ہے کیونکہ اس سے کھلاڑیوں کو بین الاقوامی کرکٹ میں اپنی تیاری کو مزید بہتر بنانے کا موقع ملے گا۔

چین کے شہر سانیا میں ایشین بیچ گیمز میں پاکستان نے مجموعی طور پر 3 تمغے جیت لئے، ریسلنگ میں 2 سلور اور کبڈی میں برانز میڈل جیتا۔

ریسلنگ میں پاکستان کے اسد اللّٰہ نے سلور میڈل اپنے نام کر لیا، 80 کے جی کلاس کے فائنل میں اسد اللّٰہ کو ایرانی پہلوان سے شکست کا سامنا کرنا پڑا۔

پاکستان کے انعام بٹ کو 90 کلو گرام کیٹیگری کے فائنل میچ میں شکست ہوئی، ایرانی پہلوان نے انعام بٹ کو چت کر دیا، انعام بٹ نے سلور میڈل اپنے نام کیا۔

70 کلو گرام کیٹیگری میں برانز میڈل کیلئے پاکستان کے عبداللّٰہ کو شکست ہوئی، محمد عبداللّٰہ کو کرغزستان کے پہلوان نے ہرایا۔