سی این این نے رپورٹ میں امریکی انٹیلی جنس ذرائع سے کہاہے کہ ایران کے سپریم لیڈر مجتبیٰ خامنہ ای صحت یاب ہو رہے ہیں۔

امریکی میڈیا کا کہنا ہے کہ فضائی حملے میں زخمی ہونے کے بعد سے مجتبیٰ خامنہ ای منظرِ عام سے غائب ہیں۔حملے کے دوران مجتبیٰ خامنہ ای کے چہرے اور ٹانگوں پر شدید چوٹیں آئیں۔

رپورٹ میں دعویٰ کیا گیا ہے کہ وہ اس وقت الیکٹرانک میڈیا کا استعمال نہیں کر رہے۔امریکی میڈیا کے مطابق مجتبیٰ خامنہ ای اپنے پیغامات قاصدوں کے ذریعے پہنچا رہے ہیں جبکہ ان کی سیکیورٹی مزید سخت کر دی گئی ہے۔

چین میں ایرانی سفیرعبدالرزاق رحمانی فضلی نےکہا چین نے ہمیشہ مشکل وقت میں ایران کی حمایت اور مدد کی،تہران اوربیجنگ کے تعلقات وقت کےساتھ مزیدمضبوط ہوں گے،ہم مشکل حالات میں اپنے دوستوں کوکبھی نہیں بھولیں گے۔

چین میں ایرانی سفیرعبدالرزاق رحمانی فضلی نےپریس کانفرنس کرتےہوئےکہاایرانی اور چینی وزرائے خارجہ ملاقات میں دوطرفہ تعلقات اورتعاون کے نئے شعبوں پرگفتگو ہوئی،امریکا اورایران کےدرمیان مذاکرات جاری ہیں،مذاکرات مقصد مفاہمتی یادداشت کو حتمی شکل دینا ہے۔

ایرانی سفیر نے آبنائے ہرمز کے قریب چینی آئل ٹینکر پر حملے کی خبروں پر ردِعمل دیتے ہوئے کہا ہےکہ دوست اور اسٹریٹجک شراکت دار ممالک کے جہازوں کو نشانہ نہیں بنائیں گے

امریکی وزیر خارجہ مارکو روبیو نے میڈیا سے گفتگو کرتے ہوئے کہا کہ ابھی تک ہمیں ایران سے جواب موصول نہیں ہوا،ہمیں آج ایران کاجواب ملنا چاہیے،امید ہے ہمارے درمیان سنجیدہ مذاکرات آگے بڑھیں گے۔

تفصیلات کے مطابق مارکوروبیو نے کہا کہ حزب اللہ کے ساتھ مذاکرات نہیں کریں گے،ہماری توجہ لبنانی حکومت سے بات چیت پر ہے،امریکی نیوی نے ایران آنے اور جانیوالے 70 ٹینکرز کا راستہ روکا ہوا ہے، پوپ لیوکے ساتھ ملاقات بہت مثبت رہی،انسانی بنیاد پر امداد میں اضافہ کرنے کیلئے تیار ہیں، کل کی جانیوالی کارروائی کا آپریشن ایپک فیوری سے تعلق نہیں۔

مارکوروبیو کا کہناتھا کہ ہم پرمیزائل داغے جائیں گے تو امریکا بھی جواب دے گا،چین اور تائیوان سے متعلق امریکی پالیسی میں کوئی تبدیلی نہیں ہوئی،آبنائے تائیوان میں استحکام برقرار رکھنا بہت ضروری ہے،صدر ٹرمپ کے دورہ چین کے دوران اس پر بات ہوگی،روس اور یوکرین کے درمیان ثالث کا کردار ادا کرنے کیلئے تیار ہیں،کوششیں آگے نہ بڑھ رہی ہوں تو ہم وقت ضائع کرنا نہیں چاہتے۔

ایرانی میڈیا کے مطابق ایرانی صدر مسعود پزشکیان کی سپریم لیڈر آیت الله مجتبیٰ خامنہ ای سے طویل ملاقات ہوئی۔

ایرانی صدر مسعود پزشکیان نے کہا کہ آیت الله مجتبیٰ خامنہ ای سے ملاقات اعتماد، عاجزی، گہرے خلوص سے بھر پور ماحول میں ہوئی۔

صدر پزشکیان کا کہنا تھا کہ سپریم لیڈر کے انداز گفتگو، نقطۂ نظر، نہایت عاجزانہ اور گہرے مخلصانہ رویے نے بہت متاثر کیا۔

انہوں نے کہا کہ سپریم لیڈر کے انداز نے گفتگو کے ماحول کو اعتماد، سکون، ہمدردی اور براہِ راست مکالمے پر مبنی فضا میں بدل دیا۔

ایرانی صدر نے کہا کہ سپریم لیڈر آیت الله مجتبیٰ خامنہ ای سے تقریبا ڈھائی گھنٹے بات چیت کی۔

صدر پزشکیان نے کہا کہ دشمن کا مقصد قومی یکجہتی کو نقصان پہنچانا ہے، دشمن دباؤ کے ذریعے عوام میں بے چینی اور غصہ پیدا کرنا چاہتا ہے۔

انہوں نے کہا کہ دشمن چاہتا ہے ایرانی عوام سڑکوں پر آئیں، حکومتی نظام کمزور ہو جائے، عوام کو اشتعال دلانے کیلئے امریکا اقتصادی دباؤ بڑھانے کی بات کرتا ہے۔

وائٹ ہاؤس کی پریس سیکرٹری کیرولین لیویٹ نے اپنی بیٹی کی پیدائش کا اعلان کرتے ہوئے خوشی کا اظہار کیا ہے

انہوں نے بتایا کہ ان کی نومولود بیٹی کا نام ویویانا (Viviana) رکھا گیا ہے جسے گھر میں پیار سے ’ویوی‘ کہا جائے گا۔

سوشل میڈیا پر جاری اپنے بیان میں کیرولین لیویٹ نے کہا کہ 1 مئی کو ان کی بیٹی نے خاندان میں خوشیوں کا اضافہ کیا، ان کے مطابق بچی مکمل طور پر صحت مند اور تندرست ہے۔

انہوں نے لکھا کہ ہم اس خوشی کے نئے مرحلے کو بھرپور انداز میں انجوائے کر رہے ہیں اور ہمارا بیٹا اپنی نئی بہن کے ساتھ خوشی سے ایڈجسٹ ہو رہا ہے۔

ایرانی صدر مسعود پزشکیان کا کہنا ہے کہ امریکی رویہ پیٹھ میں چھرا گھونپنے کے مترادف ہے، واشنگٹن کے طرزِ عمل نے سفارتکاری کا رخ خطرات کی جانب موڑ دیا۔

فرانسیسی صدر سے ٹیلی فونک گفتگو میں ایرانی صدر نے کہا کہ ایران نے دو مرتبہ امریکہ کے ساتھ مذاکرات کا آغاز کیا، ہر بار مذاکرات کے ساتھ ہی ایران کے خلاف فوجی جارحیت بھی کی گئی، ایران کے خلاف دوبارہ حملے نہ ہونے کی ضمانت دی جائے۔

مسعود پزشکیان کے مطابق ایران کی مسلح افواج کوئی عسکری اقدام کرتی ہیں تو اس کا اعلان کیا جاتا ہے، ایران طویل عرصے سے آبنائے ہرمز کی سلامتی کا ضامن رہا ہے، امریکی ناکہ بندی کے باعث خطہ عدم استحکام کا شکار ہوا، کسی بھی مذاکرات کی کامیابی کیلئے امریکی ناکہ بندی کا خاتمہ ضروری ہےعالمی میڈیا کے مطابق فرانسیسی صدر نے ایرانی صدر کو یو اے ای میں شہری انفراسٹرکچر پر حملوں، جہازوں پر بلاجواز حملوں پر اپنے تحفظات سے آگاہ کیا۔

فرانسیسی صدر نے کہا کہ تمام فریقین کو آبنائے ہرمزکی ناکہ بندی ختم کرنی چاہیے، ایرانی صدر کو کثیرالملکی مشن میں شمولیت کی پیشکش بھی کی، کہا کثیرالملکی مشن پر صدر ٹرمپ کے ساتھ بات کرنے کا بھی خواہاں ہوں

امریکی ٹی وی نے دعویٰ کیا ہے کہ ایران کی جانب سے امریکی تجاویز پر ثالثوں کو آج جواب دیے جانے کی توقع ہے ۔ ایران امریکا معاہدہ اِسی ہفتے ہونے کی اُمید ہے۔

وال اسٹریٹ جرنل کے مطابق امریکا نے ایران کو نیا جوہری فریم ورک پیش کردیا ہے، فریم ورک میں فردو، نطنز اور اصفہان کی جوہری تنصیبات کا مکمل خاتمہ شامل ہے۔

معاہدے کی صورت میں ایران کی زیر زمین جوہری سرگرمیوں پر مکمل پابندی ہوگی، کسی بھی وقت معائنہ کاروں کو انسپیکشن کی اجازت ہوگی، یورینیم افزودگی پر 20 سال پابندی اور تمام افزودہ ذخائر کا حوالگی مجوزہ معاہدے کا حصہ ہوں گے۔

رپورٹ کے مطابق آبنائے ہرمز کو دوبارہ کھولنے کے بعد امریکا پابندیوں میں نرمی کریگا، اگر تہران جوہری فریم ورک قبول کرتا ہے تو 30 دن تک تفصیلی مذاکرات شروع ہوں گے، پابندیوں میں نرمی صرف کارکردگی کی بنیاد پر ہوگی۔

دوسری جانب ایرانی وزارت خارجہ کے ترجمان اسماعیل بقائی واضح کرچکے ہیں کہ ایران امریکی تجاویز کا جائزہ لینے کے بعد پاکستان کو اپنے مؤقف سے آگاہ کرے گا ۔ بات چیت کی کامیابی کیلئے نیک نیتی لازمی ہے ۔

سعودی عرب نے خطے میں جاری حالیہ فوجی کشیدگی پر شدید تشویش کا اظہار کرتے ہوئے فریقین سے کشیدگی کم کرنے اور تحمل سے کام لینے کی اپیل کی ہے۔

جدہ میں سعودی ولی عہد اور وزیراعظم شہزادہ محمد بن سلمان کی زیر صدارت سعودی کابینہ کا اجلاس ہوا جس میں علاقائی صورتحال کا جائزہ لیا گیا، اجلاس میں خطے میں جاری حالیہ کشیدگی پر اظہار تشویش کرتے ہوئے فریقین سے کشیدگی کم کرنے پر زور دیا گیا۔

میڈیا رپورٹس کے مطابق کابینہ اجلاس میں تنازع کے حل میں مدد کیلئے پاکستان کی ثالثی کی کوششوں کی حمایت کا اعادہ کیا گیا اور سیاسی حل اور مزید کشیدگی اور عدم استحکام سے بچنے کیلئے ثالثی کی کوششوں حمایت کی گئی۔

سعودی کابینہ کے اجلاس میں آبنائے ہرمز میں جہازوں کی محفوظ اور بلارکاوٹ آمدورفت یقینی بنانے پر بھی زور دیا گیا۔

سعودی وزارت خارجہ نے پاکستان کی ثالثی اور سفارتی کوششوں کی حمایت کرتے ہوئے کہا کہ مسئلے کا ایسا سیاسی حل تلاش کیا جائے جو خطے کو مزید کشیدگی اور عدم استحکام سے بچا سکے۔

سعودی میڈیا کے مطابق اجلاس میں سعودی وزارت انصاف اور پاکستانی وزارت قانون میں تعاون کی مفاہمتی یادداشت بھی منظور کی گئی۔

عالمی منڈی میں خام تیل کی قیمتوں میں آج پھر کمی ریکارڈ کی جارہی ہے۔

امریکی کروڈ آئل 1.71ڈالرکمی کے بعد 100ڈالر فی بیرل پر آگیا،جبکہ برینٹ کروڈ آئل 2 فیصد کمی کے بعد 108 ڈالر فی بیرل پر ٹریڈ کررہا ہے

دوسری طرف دنیابھرکی اسٹاک مارکیٹس میں تیزی کارجحان دیکھاجارہاہے،جنوبی کوریاکی اسٹاک مارکیٹ کےانڈیکس میں ساڑھے 5 فیصد اضافہ ریکارڈکیاگیا،شنگھائی اسٹاک مارکیٹ کےانڈیکس میں ڈیڑھ فیصد اضافہ ہوا،جاپان ،ہانگ کانگ ،نیوزی لینڈ، آسٹریلیا، ملائیشیا کی اسٹاک مارکیٹ میں بھی تیزی ریکارڈ کی جارہی ہے۔

امریکا کے جوائنٹ چیفس آف اسٹاف جنرل ڈین کین نے وزیر دفاع و جنگ پیٹ ہیگستھ کے ساتھ مشترکہ پریس بریفنگ میں ایران جنگ پر تفصیلی گفتگو کی۔

جوائنٹ چیفس آف اسٹاف جنرل ڈین کین نے بتایا کہ ہم نے کل آبنائے ہرمز میں ایران کے حملوں کا سامنا کیا جب اُس نے کمرشل بحری جہازوں پر 9 بار فائرنگ کی۔ جواب میں ہمارے ڈسٹرائرز نے ایران کی کشتیوں کو تباہ کردیا۔

انھوں نے مزید کہا کہ امریکا کے 2 بحری جہاز آبنائے ہرمز سے گزر گئے۔ توقع ہے کہ آبنائے ہرمز سے مزید بحری جہاز گزریں گے۔ ضرورت پڑی تو ایران پر دوبارہ حملوں بھی تیار ہیں۔

امریکی جنرل ڈین کین نے مزید کہا کہ ایران اس وقت راکھ میں چنگاری لگانے کی کوشش کر رہا ہے۔ جس میں سب سے زیادہ تباہی خود ایران کی ہی ہوگی۔