ہر نا ئی( آئی این پی )گزشتہ روز سوشل میڈیا پر ایک ویڈیو تیزی سے گردش کر رہی تھی جس میں ہرنائی کے مقامی "مبارک ہوٹل” میں فروخت کیے جانے والے مرغی کے گوشت (پیس) میں کیڑے مکوڑوں کی موجودگی کی نشاندہی کی گئی تھی۔ ویڈیو وائرل ہوتے ہی شہریوں میں شدید غم و غصہ پایا گیا، جس پر اعلیٰ حکام نے فوری ایکشن لینے کے احکامات جاری کیے۔ڈپٹی کمشنر ہرنائی ارشد حسین جمالی کی خصوصی احکامات کی روشنی میں ڈپٹی ڈائریکٹر فوڈ آپریشن سبی ڈویژ ن نجیب اللہ ترین نے اپنی فنی ٹیم اور ایڈیشنل ڈپٹی کمشنر ہرنائی محمد سلیم ترین کے ہمراہ مذکورہ ہوٹل پر چھاپہ مارا اور صورتحال کا تفصیلی جائزہ لیا۔ معائنے کے دوران ہوٹل کے کچن میں صفائی کے انتہائی ناقص انتظامات پائے گئے اور ویڈیو میں دکھائی گئی شکایت کی موقع پر تصدیق ہو گئی۔انتظامیہ نے عوامی صحت کو خطرے میں ڈالنے اور فوڈ سیفٹی قوانین کی سنگین خلاف ورزی پر مبارک ہوٹل کو فوری طور پر سیل کر دیا اور مالکان کے خلاف قانونی کارروائی کا آغاز کر دیا گیا۔اس موقع پر گفتگو کرتے ہوئے ایڈیشنل ڈپٹی کمشنر محمد سلیم ترین اور ڈپٹی ڈائریکٹر فوڈ کا کہنا تھا کہ انسانی زندگیوں سے کھیلنے کی کسی کو اجازت نہیں دی جائے گی۔ انہوں نے واضح کیا کہ ڈپٹی کمشنر ہرنائی کی خصوصی ہدایت پر تمام ہوٹلوں اور کھانے پینے کے مراکز کی مانیٹرنگ سخت کر دی گئی ہے۔ شہریوں کو معیاری اور صاف ستھری غذا کی فراہمی حکومت کی اولین ترجیح ہے اور اس سلسلے میں کسی بھی بااثر شخص یا ادارے کے ساتھ رعایت نہیں برتی جائے گی۔

سنجاوی: سنجاوی کے عوام کا دیرینہ اور اہم مطالبہ بالآخر پورا کر دیا گیا، جس پر علاقے میں خوشی کی لہر دوڑ گئی ہے۔ صوبائی وزیر خوراک و چیئرمین فوڈ اتھارٹی، حاجی نور محمد خان دومڑ اور میونسپل کمیٹی کے چیئرمین حاجی خان محمد دومڑ کی خصوصی کاوشوں سے سنجاوی میں فائر بریگیڈ کی فراہمی ممکن ہو گئی صوبائی وزیر حاجی نور محمد خان دومڑ نے کہا کہ سنجاوی کے عوام کا یہ ایک دیرینہ مطالبہ تھا، جس کی تکمیل سے علاقے میں ایمرجنسی صورتحال سے نمٹنے کی صلاحیت میں نمایاں بہتری آئے گی۔ انہوں نے کہا کہ عوام کی جان و مال کا تحفظ حکومت کی اولین ترجیح ہے اور اس مقصد کے لیے ہر ممکن اقدامات کیے جا رہے ہیں انہوں نے مزید کہا کہ سنجاوی کو ترقی کی راہ پر گامزن کرنا ہماری ذمہ داری ہے اور اس سلسلے میں مزید ترقیاتی منصوبے بھی جلد شروع کیے جائیں گے میونسپل کمیٹی کے چیئرمین حاجی خان محمد دومڑ نے بھی اس اقدام کو عوامی خدمت کا عملی مظہر قرار دیتے ہوئے کہا کہ فائر بریگیڈ کی دستیابی سے کسی بھی ناخوشگوار واقعے کی صورت میں فوری امداد فراہم کی جا سکے گی علاقہ مکینوں نے اس اہم اقدام پر صوبائی وزیر اور میونسپل کمیٹی کے چیئرمین کا شکریہ ادا کرتے ہوئے امید ظاہر کی کہ مستقبل میں بھی اسی طرح عوامی مسائل کو ترجیحی بنیادوں پر حل کیا جاتا رہے گا۔