ژوب (این این آئی) ژوب سمیت بلوچستان کے سیلاب سے متاثرہ چھ اضلاع میں بلوچستان رورل سپورٹ پروگرام (بی آر ایس پی) نے یورپی یونین اور پاکستان پاورٹی ایلیویشن فنڈ (پی پی اے ایف) کے مالی تعاون اور محکمہ لائیو اسٹاک بلوچستان کے اشتراک سے مالداروں کے لیے منصوبے کا آغاز کردیا۔ یہ پراجیکٹ ژوب، لورالائی، پشین، خضدار، لسبیلہ اور جعفرآباد کے ایک سو بیس یونین کونسلوں میں جاری ہے، جس کا بنیادی مقصد نہ صرف متاثرہ خاندانوں کو وقتی امداد فراہم کرنا ہے بلکہ موسمیاتی تبدیلی کے تناظر میں ایک پائیدار، مضبوط اور خودکفیل دیہی معیشت کی بنیاد بھی رکھنا ہے۔ڈسٹرکٹ پروگرام مینیجر بی آر ایس پی قطب خان آفاقی کا کہنا ہے کہ پراجیکٹ کا ایک اہم مقصد لائیو اسٹاک ویلیو چین کو مضبوط بنانا یعنی مالداری کے معاشی قدر میں اضافہ کرنا بھی ہے۔ مالداروں کی عملی تربیت، ری اسٹاکنگ، اور معاشی خدمات تک رسائی منصوبے کے اہم اہداف ہیں۔” پراجکیٹ کا مقصد سیلاب سے متاثرہ خاندانوں کی بحالی، مالداری پر منحصر دیہی معیشت کو مضبوط بنانا، ڈیری شعبے میں بہتری لانا، خواتین اور نوجوانوں کی شرکت میں اضافہ، مالیاتی سہولیات تک رسائی دینا اور موسمیاتی لحاظ سے محفوظ اور پائیدار مالداری نظام کا قیام شامل ہیں۔”اس پراجیکیٹ کے تحت بارہ سو لائیو اسٹاک گروپس اور ایک ہزار سے زائد پروڈیوسر گروپس تشکیل دیے جا رہے ہیں تاکہ مالداروں کو پیداوار، مارکیٹ تک رسائی اور بہتر قیمتوں کے مواقع فراہم کیے جاسکیں۔ علاوہ ازین لائیو اسٹاک مارکیٹس یا مویشی منڈیاں بھی قائم کی جائیں گی، جبکہ چوبیس چھوٹے اور درمیانے درجے کے کاروباری اداروں (ایس ایم ایز) کو میچنگ گرانٹس دی جارہی ہیں۔ پراجیکٹ کے تحت دس ہزار مستحق خاندانوں کو مویشی فراہم کیے جارہے ہیں، جبکہ چھ ہزار پانچ سو افراد کو کمیونٹی لائیولی ہڈ فنڈ کے توسط سے مالی معاونت دی جا رہی ہے۔ علاوہ ازیں تقریباً چھ سو ولیج آرگنائزیشنز اور پروڈیوسر گروپس بھی براہ راست اس پروگرام سے مستفید ہوں گے۔ مختلف سلاٹر ہاو¿سز یا مذبح خانوں کی مرمت اور سہولیات کی فراہمی بھی منصوبے کا حصہ ہے۔قطب خان آفاقی کے مطابق محکمہ جنگلات کے تعاون سے رینج لینڈ کی نشاندہی کی جارہی ہے، تاکہ شجرکاری کرکے مویشیوں کے لیے چراگاہوں کو بہتر بنایا جا سکے اور پائیدار مالداری کو فروغ دیا جا سکے۔

ژوب ‘ڈپٹی کمشنر ژوب محمد عارف زرکون کی ہدایات کی روشنی میں ضلعی انتظامیہ نے شہر میں بڑھتے ہوئے ٹریفک مسائل، غیر قانونی پارکنگ اور تجاوزات کے خلاف کریک ڈاو¿ن تیز کر دیا ہے۔ اس سلسلے میں روزانہ کی بنیاد پر صبح اور شام کے اوقات میں شہر کی اہم شاہراہوں پر کارروائیاں عمل میں لائی جا رہی ہیں۔انتظامیہ کے مطابق کارروائیوں کے دوران سڑکوں پر قائم غیر قانونی ریڑھیوں، ٹریفک کی روانی میں خلل ڈالنے والی پارکنگ اور دیگر تجاوزات کو ہٹایا جا رہا ہے، جبکہ خلاف ورزی کرنے والوں کے خلاف قانونی اقدامات بھی کیے جا رہے ہیں۔ حکام کا کہنا ہے کہ ان اقدامات کا مقصد شہریوں کو درپیش مشکلات کا ازالہ اور ٹریفک کے نظام کو بہتر بنانا ہے۔ڈپٹی کمشنر نے عوام، تاجروں اور انجمن تاجران سے اپیل کی ہے کہ وہ شہر میں نظم و ضبط برقرار رکھنے کے لیے ضلعی انتظامیہ کے ساتھ مکمل تعاون کریں اور خود بھی ٹریفک قوانین کی پابندی کو یقینی بنائیں۔ضلعی انتظامیہ ژوب نے شہری سہولیات کی بہتری کے لیے صفائی مہم کا بھی آغاز کر دیا ہے۔ اس مہم کے تحت میونسپل کمیٹی کے عملے کو متحرک کرتے ہوئے شہر کے مختلف علاقوں میں صفائی ستھرائی کے اقدامات کیے جا رہے ہیں، جبکہ نالوں کی صفائی اور کچرے کی بروقت تلفی کو بھی یقینی بنایا جا رہا ہے۔ انتظامیہ کا کہنا ہے کہ جلد ہی شہر میں مزید ترقیاتی منصوبوں کا آغاز بھی متوقع ہے، جن سے عوام کو بہتر سہولیات میسر آئیں گی۔

بلوچستان کے ضلع بارکھان اور ژوب سمیت مختلف علاقوں میں زلزلے کے جھٹکے محسوس کیے گئے۔ جس سے لوگوں میں خوف و ہراس پھیل گیا۔

زلزلہ پیما مرکز کے مطابق زلزلے کی شدت 4.5، گہرائی 25 کلومیٹر ریکارڈ کی گئی، جبکہ مرکز ژوب سے 110 کلومیٹر دور جنوب مشرق میں تھا۔

زلزلے کے باعث لوگوں میں خوف و ہراس پھیل گیا اور کلمہ طیبہ کا ورد کرتے ہوئے گھروں سے باہر آ گئے تاہم  کسی جانی و مالی نقصان کی کوئی اطلاع نہیں ملی۔

ژوب(یو این اے )میونسپل کمیٹی ژوب کے ترقیاتی فنڈز سے شہر کے مرکزی بازار میں فیز ون کے تحت اسپیڈ بریکرز اور اسٹاپرز کی تنصیب کا کام تیزی سے جاری ہے جو اب تکمیل کے قریب ہے۔ یہ اقدامات مٹھا خان کاروان کے میونسپل کمیٹی ژوب کے چیئرمین شاہ بران کاکڑ، چیف آفیسر جہانگیر خان مندوخیل اور اسسٹنٹ انجینئر شیخ مجیب الرحمن مندوخیل کی خصوصی دلچسپی اور کوششوں سے کیے جا رہے ہیں تاکہ شہر میں ٹریفک کی روانی کو بہتر اور حادثات کو کم کیا جا سکے۔منصوبے کے مطابق، میونسپل کمیٹی کے فنڈز سے شہر کے مختلف اہم مقامات پر ون وے اسپیڈ بریکرز اور اسٹاپرز لگائے جا رہے ہیں۔ فیز ون کی کامیابی کے بعد، ان شا اللہ فیز ٹو کا آغاز کیا جائے گا جس کے تحت شہر کی دیگر رابطہ سڑکوں پر بھی اسی طرح کے اسپیڈ بریکرز نصب کیے جائیں گے۔اس موقع پر چیئرمین شاہ بران کاکڑ نے داد خان مندوخیل، کونسلر اجمل اعوان، کونسلر اللہ داد ناصر، نجیب خروٹی اور دیگر اراکین کے ہمراہ جاری ترقیاتی کاموں کا تفصیلی معائنہ کیا۔ انہوں نے کام کے معیار پر اطمینان کا اظہار کیا اور متعلقہ حکام کو ہدایت کی کہ کام کی بروقت تکمیل کو یقینی بنایا جائے تاکہ شہریوں کو آمد و رفت میں آسانی میسر آ سکے۔

بلوچستان میں آج سے 7 اپریل تک تیز بارشوں اور آندھی کا امکان،پی ڈی ایم اے نے الرٹ جاری کردیا۔

پی ڈی ایم اے نےصوبے کے مختلف اضلاع میں الرٹ جاری کر دیا،پی ڈی ایم اے کے مطابق ژوب،قلعہ سیف اللہ،کوہلو،موسیٰ خیل اور بارکھان،خضدار، قلات، سوراب اورمستونگ میں تیز ہواؤں کے ساتھ بارش متوقع ہے۔

6 سے 7 اپریل کےدوران ندی نالوں میں طغیانی کاخدشہ ہے،پہاڑی علاقوں میں لینڈسلائیڈنگ کا بھی امکان ہے،پی ڈی ایم اے نےمتعلقہ اداروں کو الرٹ رہنےکی ہدایت جاری کردی،پی ڈی ایم اے نےشہری غیرضروری سفر سے گریز اوراحتیاطی تدابیرکی ہدایت کی ہے۔

بلوچستان کے علاقے گوسہ کبزئی میں بارش کے بعد ایک مکان کی چھت گرنے سے ایک بچہ جاں بحق جبکہ 6 بچے زخمی ہوگئے۔

اسپتال ذرائع کے مطابق واقعہ کے فوراً بعد جاں بحق بچے اور زخمیوں کو ٹراما سنٹر ژوب منتقل کیا گیا جہاں زخمی بچوں کو فوری طبی امداد فراہم کی گئی۔

ذرائع کا کہنا ہے کہ ابتدائی طبی امداد کے بعد زخمی بچوں کو ڈسچارج کر دیا گیا جبکہ جاں بحق بچے کی میت ضروری کارروائی مکمل کرنے کے بعد ورثاء کے حوالے کر دی گئی۔

مقامی افراد کے مطابق حالیہ بارشوں کے باعث کچے اور بوسیدہ مکانات کو شدید نقصان پہنچا ہے جس کے باعث ایسے حادثات کا خطرہ بڑھ گیا ہے۔

شہریوں نے حکام سے مطالبہ کیا ہے کہ متاثرہ علاقوں میں حفاظتی اقدامات کیے جائیں تاکہ مزید قیمتی جانوں کے ضیاع سے بچا جا سکے۔