مچھ(آئی این پی) بولان کے علا قے مچھ میںواقع کو ئلہ کا ن میں زہریلی گیس بھرنے سے3 مزدور جاں بحق ہو گئے ہیں۔پولیس ذرائع کے مطابق جاں بحق افراد میں مراد بخش، علی حسن ولد عبدالخالق قوم بنگلزئی ساکن مچھ اور دلاور خان سکنہ کشتری شامل ہیں۔ ابتدائی اطلاعات کے مطابق مزدور لیز کے اندر کام میں مصروف تھے کہ اچانک زہریلی گیس بھر گئی جس کے باعث وہ دم گھٹنے سے جانبر نہ ہو سکے۔واقعے کی اطلاع ملتے ہی پولیس فوری طور پر جائے وقوعہ پر پہنچ گئی اور لاشوں کو تحویل میں لے کر سول ہسپتال منتقل کیاجہاں ضروری قانونی کارروائی کے بعد میتیں ورثاءکے حوالے کر دی گئیں۔پولیس کے مطابق واقعے کی مزید تحقیقات جاری ہیں تاکہ حادثے کی اصل وجوہات کا تعین کیا جا سکے جبکہ متعلقہ حکام سے حفاظتی اقدامات کو یقینی بنانے کا بھی مطالبہ کیا جا رہا ہے تاکہ آئندہ ایسے واقعات سے بچا جا سکے۔

کوئٹہ : نیشنل پارٹی کے صوبائی جنرل سیکرٹری چنگیز حئی بلوچ نے ایک بیان میں ضلع کچھی میں حالیہ بارشوں، ژالہ باری اور سیلابی ریلوں سے ہونے والے نقصانات پر گہری تشویش کا اظہار کیا ہے۔ انہوں نے کہا کہ قدرتی آفت نے علاقے میں بڑے پیمانے پر تباہی مچا دی ہے، جس کے نتیجے میں زمینداروں کی کھڑی فصلیں مکمل طور پر تباہ، مال مویشی ہلاک اور شہریوں کے گھروں کو شدید نقصان پہنچا ہے۔ ان کا کہنا تھا کہ تحصیل بھاگ، ڈھاڈر، مچھ، سنی اور دیگر علاقوں میں بنیادی انفراسٹرکچر بری طرح متاثر ہوا ہے۔چنگیز حئی بلوچ نے خاص طور پر یونین کونسل جلال خان کی صورتحال کا ذکر کرتے ہوئے کہا کہ کئی روز سے زمینی رابطہ منقطع ہونے کی وجہ سے متاثرہ خاندان شدید مشکلات اور تنہائی کا شکار ہیں۔ رابطہ سڑکیں ٹوٹ جانے کی وجہ سے امدادی سرگرمیوں میں بھی رکاوٹیں پیش آ رہی ہیں۔ انہوں نے واضح کیا کہ سیلاب نے عام عوام کو ناقابلِ تلافی مالی نقصان پہنچایا ہے اور متاثرہ علاقوں میں انسانی المیہ جنم لے رہا ہے، جس کے لیے فوری حکومتی مداخلت کی ضرورت ہے۔انہوں نے حکومتِ وقت اور ضلعی انتظامیہ سے مطالبہ کیا کہ تباہ شدہ سڑکوں کی فوری مرمت اور بحالی کو یقینی بنایا جائے تاکہ متاثرہ علاقوں تک رسائی ممکن ہو سکے۔ اس کے علاوہ، انہوں نے زمینداروں کے لیے خصوصی مالی امداد اور زرعی پیکیج فراہم کرنے کا مطالبہ بھی کیا تاکہ وہ اپنے پیروں پر کھڑے ہو سکیں۔ چنگیز حئی بلوچ نے خبردار کیا کہ اگر بروقت اقدامات نہ کیے گئے تو صورتحال مزید سنگین ہو جائے گی، جس کی تمام تر ذمہ داری انتظامیہ پر عائد ہوگی۔

بولان(این این آئی)حالیہ شدید طوفانی بارشوں اور ژالہ باری نے ڈھاڈر اور گردونواح کے علاقوں میں بڑے پیمانے پر تباہی مچا دی ہے جس کے نتیجے میں ڈھاڈر کے متعدد دیہاتوں کا زرعی شعبہ بری طرح متاثر ہوا ہے مقامی زمینداروں و کاشتکاروں کو کروڑوں روپے کے نقصانات کا سامنا کرنا پڑا ہے ان خیالات کا اظہار شہری ایکشن کمیٹی ڈھاڈر کے صدر آغا محمد رحیم احمد زئی نے ڈھاڈر پریس کلب کے صحافیوں سے خصوصی گفتگو میں کیا انکا کہنا تھا کہ طوفانی بارشوں اور ژالہ باری کے باعث ڈھاڈر گردونواح کے متعدد دیہات شدید متاثر ہوئے ہیں جن میں میر باغ، کوٹ رئیسانی، کوٹ کھائی، غلام بولک، جلبانی، چرخی، نغاری سمیت دیگر علاقے شامل ہیں انہوں نے بتایا کہ ان علاقوں میں سینکڑوں ایکڑز پر کھڑی تیار فصلیں مکمل طور پر تباہ ہو چکی ہیں متاثرہ فصلوں میں گندم، سورج مکھی،خربوزے و دیگر فصلیں شامل ہیں جو کٹائی کے قریب تھیں تاہم اچانک آنے والی موسمی آفت نے کسانوں کی محنت پر پانی پھیر دیا انہوں نے کہا کہ ڑالہ باری کے باعث فصلوں کو شدید نقصان پہنچا جبکہ تیز ہواو¿ں اور بارش نے کھڑی فصلوں تہس نہس کردیا ہے انہوں نے کہا کہ اس قدرتی آفت کے باعث نہ صرف زمینداروں،کسانوں کی معاشی حالت متاثر ہوئی ہے بلکہ علاقے میں خوراک کی پیداوار پر بھی منفی اثرات مرتب ہونے کا خدشہ ہے متاثرہ کسان پہلے ہی مہنگائی اور زرعی اخراجات میں اضافے کی وجہ سے مشکلات کا شکار تھے اور اب اس آفت نے ان کی مشکلات میں مزید اضافہ کر دیا ہے انہوں نے صوبائی حکومت اور ضلعی انتظامیہ سے مطالبہ کیا کہ فوری طور پر متاثرہ علاقوں کا سروے کرایا جائے اور نقصانات کا تخمینہ لگا کر کسانوں کیلئے ہنگامی بنیادوں پر خصوصی ریلیف پیکیج کا اعلان کیا جائے تاکہ وہ دوبارہ اپنی زرعی سرگرمیاں بحال کر سکیں۔