کوئٹہ (سٹی رپورٹر) محکمہ جنگلات و جنگلی حیات کے عملے نے پشین میں غیر قانونی طور پر اومان کے پودوں کی سمگلنگ کی کوشش ناکام بناتے ہوئے ٹرک سے 70 من پودے برآمد کرکے 4 ملزمان کو گرفتار کرکے ٹرک قبضے میں لیکر ملزمان کے خلاف فارسٹ ایکٹ کے تحت مقدمہ درج کرلیا تفصیلات کے مطابق گزشتہ روز ڈویڑنل فارسٹ آفیسر اجمل خان، رینج فارسٹ آفیسر رمضان علی، فارسٹر نقیب اللہ اوردیگر عملے نے پشین سے سرخاب کے راستے اومان کے پودے سمگل کرنے کی کوشش ناکام بناتے ہوئے ٹرک میں لوڈ 70 من پودے قبضے میں لیکر 4 ملزمان کو گرفتار کرکے ان کے خلاف مقدمہ درج کرکے کارروائی شروع کردی۔

پشین(این این ائی) ضلع پشین کی یونین کونسل منزکی میں 2022 کے سیلاب سے متاثرہ مستحق اور کمزور گھرانوں کی معاشی بحالی کے لیے ایک اہم اقدام کے تحت 78 گھرانوں میں بھیڑوں کی تقسیم کا عمل کامیابی سے مکمل کر لیا گیا۔ یہ منصوبہ یورپی یونین، پاکستان پاورٹی ایلیویشن فنڈ کے تعاون سے بلوچستان رورل سپورٹ پروگرام کے ذریعے پایہ تکمیل تک پہنچایاگیا۔منصوبے کے طے شدہ معیار کے مطابق صرف ا±ن گھرانوں کو شامل کیا گیا جو 2022 کے سیلاب سے شدید متاثر ہوئے تھے اور معاشی طور پر نہایت کمزور تھے۔ ہر مستفید خاندان کو پانچ بھیڑیں فراہم کی گئیں تاکہ وہ ایک پائیدار ذریعہ معاش حاصل کر سکیں اور اپنی آمدن میں بہتری لا سکیں۔تقسیم کے عمل کو شفاف بنانے کے لیے مقامی قیادت، یونین کونسل کے نمائندگان، کونسلرز، چیئرمین اور دیگر کمیونٹی شراکت داروں نے فعال کردار ادا کیا اور اس عمل کی نگرانی کو یقینی بنایا۔مزید برآں، جانوروں کی صحت اور بہتر نگہداشت کے لیے محکمہ لائیو اسٹاک کے ویٹرنری ڈاکٹروں کی خدمات بھی فراہم کی جا رہی ہیں، جو باقاعدگی سے معائنہ کرنے کے ساتھ ساتھ بیماریوں سے بچاو¿ اور افزائش کے حوالے سے رہنمائی فراہم کر رہے ہیں۔یہ منصوبہ نہ صرف سیلاب متاثرین کی بحالی اور معاشی استحکام میں معاون ثابت ہو رہا ہے بلکہ غربت میں کمی اور لائیو اسٹاک کے شعبے کی ترقی میں بھی اہم کردار ادا کر رہا ہے۔

پشین (یو این اے)پشین کے علاقے یارو میں پیش آنے والے افسوسناک واقعے کے شہدا کے لواحقین نے انصاف کی فراہمی اور ملزمان کی عدم گرفتاری کے خلاف شدید احتجاج کرتے ہوئے پشین کوئٹہ نیشنل ہائی وے کو ہر قسم کی آمد و رفت کے لیے مکمل طور پر بلاک کر دیا ہے۔ لواحقین نے شاہراہ کے دونوں اطراف رکاوٹیں کھڑی کر دی ہیں، جس کے باعث مال بردار گاڑیوں اور مسافر بسوں کی لمبی قطاریں لگ گئی ہیں اور مسافروں کو سخت گرمی میں شدید پریشانی کا سامنا ہے۔احتجاجی مظاہرین کا کہنا ہے کہ سانحہ یارو کو گزرنے کے باوجود انتظامیہ اور پولیس ملوث ملزمان کو گرفتار کرنے میں ناکام رہی ہے۔ لواحقین نے دو ٹوک مطالبہ کیا ہے کہ جب تک واقعے میں ملوث اصل ملزمان کو گرفتار کر کے قانون کے کٹہرے میں نہیں لایا جاتا، ان کا احتجاج اور شاہراہ کی بندش کا سلسلہ غیر معینہ مدت تک جاری رہے گا۔ انہوں نے حکامِ بالا سے فوری مداخلت اور انصاف کی اپیل کی ہے، جبکہ انتظامیہ کی جانب سے مظاہرین کے ساتھ مذاکرات کی کوششیں کی جا رہی ہیں تاکہ شاہراہ کو کھولا جا سکے۔