گوادر (این این آئی)پسنی اور اورماڑہ میں غیر قانونی ٹرالرز کی یلغار، ساحلی روزگار اور ماحول دونوں خطرے میں،سمندری وسائل کی تباہی کا خدشہ، غیر قانونی ٹرالنگ کے خلاف فوری کارروائی کا مطالبہ،محکمہ فشریز کی خاموشی، پسنی و اورماڑہ کے ماہی گیر مشکلات کا شکار ، مقامی ماہیگیروں نے ٹرالرز کی ویڈیو وائرل کردی،تفصیلات کے مطابق پسنی اور اورماڑہ کے سمندری حدود میں غیر قانونی ٹرالنگ کے بڑھتے ہوئے رجحان نے مقامی ماہی گیروں کو شدید تشویش میں مبتلا کر دیا ہے۔ مقامی ماہیگیروں کی جاری کردہ ویڈیو کے مطابق بڑے ٹرالرز کی یلغار نہ صرف ان کے روزگار کو متاثر کر رہی ہے بلکہ سمندری حیات کے لیے بھی سنگین خطرات پیدا ہو گئے ہیں۔ذرائع کا کہنا ہے کہ یہ ٹرالرز غیر قانونی اور باریک جالوں کا استعمال کر رہے ہیں جس کے باعث چھوٹی مچھلیاں اور دیگر آبی حیات بھی بڑی تعداد میں شکار ہو رہی ہیں۔ ماہرین کے مطابق اس طرز کی ماہی گیری سمندری ماحولیاتی توازن کو تباہ کرنے کے مترادف ہے اور اس کے طویل المدتی اثرات انتہائی نقصان دہ ہو سکتے ہیں۔مقامی ماہی گیروں نے الزام عائد کیا ہے کہ محکمہ فشریز اس صورتحال پر قابو پانے میں ناکام دکھائی دے رہا ہے۔ ان کا کہنا ہے کہ متعدد بار شکایات کے باوجود غیر قانونی ٹرالنگ کے خلاف مو¿ثر کارروائی عمل میں نہیں لائی جا سکی، جس سے ان کے معاشی حالات مزید خراب ہو رہے ہیں۔ماہی گیروں نے حکومت سے مطالبہ کیا ہے کہ فوری طور پر غیر قانونی ٹرالنگ کے خلاف سخت اقدامات کیے جائیں، ذمہ دار عناصر کے خلاف کارروائی کی جائے اور سمندری وسائل کے تحفظ کو یقینی بنایا جائے تاکہ مقامی افراد کے روزگار اور سمندری حیات کو بچایا جا سکے۔

گوادر (این این آئی)گوادر و پسنی میں ایرانی پٹرول کی قیمتوں میں ہوشربا اضافہ، غریب عوام ، ماہیگیر مشکلات کا شکار،ملک میں پٹرولیم مصنوعات مہنگی ہوتے ہی ٹیکس فری ایرانی پٹرول بھی مہنگا، ضلعی انتظامیہ سے فوری نوٹس لینے کا مطالبہ،تفصیلات کے مطابق ملک میں پٹرولیم مصنوعات کی قیمتوں میں حالیہ اضافے کے بعد گوادر اور پسنی میں بھی ٹیکس فری ایرانی پٹرول کی قیمتوں میں غیر معمولی اضافہ دیکھنے میں آیا ہے، جس کے باعث مقامی غریب عوام شدید پریشانی میں مبتلا ہو گئے ہیں۔ذرائع کے مطابق مقامی پمپ مالکان اور غیر قانونی طور پر ایرانی پٹرول فروخت کرنے والے عناصر نے من مانے نرخ مقرر کر لیے ہیں اور سرکاری نرخنامے کی عدم موجودگی میں شہریوں کو مہنگے داموں پٹرول خریدنے پر مجبور کیا جا رہا ہے۔علاقہ مکینوں کا کہنا ہے کہ پہلے ایرانی پٹرول نسبتاً سستا ہونے کے باعث عام آدمی کے لیے سہولت کا باعث تھا، تاہم حالیہ دنوں میں اس کی قیمتوں میں اچانک اور بے قابو اضافہ غریب طبقے کے لیے ایک نیا بوجھ بن گیا ہے۔شہریوں نے الزام عائد کیا ہے کہ متعلقہ حکام کی جانب سے کسی قسم کی نگرانی نہ ہونے کے باعث پمپ مالکان کھلے عام منافع خوری کر رہے ہیں۔ انہوں نے مطالبہ کیا کہ ضلعی انتظامیہ فوری کارروائی کرے اور قیمتوں کو کنٹرول کرنے کے لیے مو¿ثر اقدامات اٹھائے۔عوامی حلقوں نے ڈپٹی کمشنر گوادر سے اپیل کی ہے کہ وہ صورتحال کا نوٹس لیتے ہوئے غیر قانونی فروخت اور من مانے نرخوں کا سدباب کریں تاکہ شہریوں کو مزید استحصال سے بچایا جا سکے