اوتھل (این این آئی)ایس ایس پی لسبیلہ نجیب اللہ پندرانی کی ہدایت پر ایس ایچ او اوتھل وحید علی مگسی نے پولیس ٹیم کے ہمراہ بین الصوبائی اسمگلروں کے خلاف گھیرا تنگ کرتے ہوئے۔آٹھ ارب ریال کے قریب غیر ملکی کرنسی کی اسمگلنگ کی بڑی کوشش ناکام بنا دی، کارروائی کے دوران گاڑی سے اربوں ایرانی ریال برآمد کر کے کسٹمز حکام کے حوالے کر دیے گئے،تفصیلات کے مطابق ایس ایس پی لسبیلہ نجیب اللہ پندرانی کی جانب سے ضلع بھر میں جرائم پیشہ عناصر اور اسمگلنگ کی روک تھام کے لیے جاری خصوصی مہم کے سلسلے میں ایس ایچ او اوتھل وحید علی مگسی نے پولیس ٹیم کے ہمراہ مین آر سی ڈی روڈ پر زیرو پوائنٹ پر چیکنگ کے دوران کوئٹہ سے کراچی جانے والی ایک مشکوک کار کو روک کر تلاشی لی گئی۔ پولیس کے مطابق تلاشی کے دوران گاڑی کے خفیہ خانوں سے سات ارب اٹھاسی کروڑ (7,880,000,000) ایرانی ریال برآمد ہوئے۔ اتنی خطیر رقم کی غیر قانونی منتقلی پر پولیس نے فوری طور پر کرنسی قبضے میں لے کر کارروائی کا آغاز کر دیا۔وتھل پولیس نے ابتدائی ضابطے کی کارروائی مکمل کرنے کے بعد برآمد شدہ تمام غیر ملکی کرنسی کو مزید قانونی چارہ جوئی اور تحقیقات کے لیے کسٹم حکام وندر کے حوالے کر دیا ہے۔ ایس ایس پی لسبیلہ نے اس کامیاب کارروائی پر ایس ایچ او اوتھل اور ان کی ٹیم کی کارکردگی کو سراہا ہے۔

اوتھل(نامہ نگار) ایس ایس پی لسبیلہ نجیب اللہ پندرانی کی جرائم پیشہ عناصر کے خلاف کارروائیوں کی خصوصی ہدایات پر عملدرآمد کرتے ہوئے انچارج سی آئی اے پولیس لسبیلہ جان محمد جاموٹ نے اپنی ٹیم کے ہمراہ کامیاب کارروائی کرتے ہوئے ایک اشتہاری ملزم کو گرفتار کرلیا۔ پولیس کے مطابق دوران اسنیپ چیکنگ لنک روڈ ریک گوٹھ بیلہ کے مقام پر کارروائی کرتے ہوئے صوبہ سندھ کے تھانہ مٹیاری کو ڈکیتی کے مقدمہ نمبر 78/2019 میں مطلوب اشتہاری ملزم ارباب شر ولد چاکر، قوم شر، سکنہ مٹیاری (حال مانگیہ گوٹھ بیلہ) کو گرفتار کیا گیا۔سی آئی اے پولیس لسبیلہ نے ضروری قانونی کارروائی کے بعد گرفتار ملزم کو تھانہ بیلہ پولیس کے حوالے کردیا ہے، جبکہ اس کی گرفتاری سے متعلق تھانہ مٹیاری سندھ کو بھی آگاہ کردیا گیا ہے۔ مزید قانونی تقاضے مکمل کرنے کے بعد ملزم کو سندھ پولیس کے حوالے کیا جائے گا۔

اوتھل (یو این اے )جام گروپ کے رہنما و جنرل کونسلر محمد بخش برہ نے کہا ہے کہ 2022 کے تباہ کن سیلاب کے دوران ہونے والے سروے میں متعدد گھروں کے مکمل تباہ اور کئی کے خستہ حال ہونے کی نشاندہی کی گئی تھی، جس کے بعد عالمی مالیاتی ادارے کی جانب سے متاثرین کی بحالی کے لیے فنڈز فراہم کیے گئے۔انہوں نے بتایا کہ ورلڈبینک کی جانب سے گھروں کی تعمیر کے لیے رقم NRSP کو فراہم کی گئی، جس کے تحت کچھ متاثرین کو مالی امداد دی گئی، تاہم بڑی تعداد میں مستحق افراد اب بھی اس سہولت سے محروم ہیں۔محمد بخش برہ کے مطابق، اس منصوبے کو شروع ہوئے دو سال سے زائد کا عرصہ گزر چکا ہے لیکن ان کے حلقہ انتخاب کے علاقے موضع ٹوڑی، کاٹھور اور دیگر دیہات میں کئی متاثرین کو تاحال امداد نہیں مل سکی، جس کے باعث وہ بے یار و مددگار امداد کے منتظر ہیں۔انہوں نے وفاقی وزیر نواب جام کمال خان عالیانی اور وزیراعلی بلوچستان سرفراز بگٹی سے مطالبہ کیا کہ جن متاثرین کو ابھی تک گھروں کی تعمیر کے لیے مالی امداد فراہم نہیں کی گئی، انہیں فوری طور پر رقم جاری کی جائے تاکہ وہ اپنے گھر تعمیر کرکے اپنے اہل خانہ کے ساتھ باعزت اور پرسکون زندگی گزار سکیں۔

لسبیلہ(یو این اے )لسبیلہ کے ضلعی ہیڈکوارٹر اوتھل میں درگاہ سید حسین شاہ، جامع مسجد نورانی اور میونسپل کمیٹی اوتھل کو جانے والی مرکزی سڑک طویل عرصے سے شدید خستہ حالی کا شکار ہے، جس کی وجہ سے شہریوں اور زائرین کو آمد و رفت میں سخت مشکلات کا سامنا کرنا پڑ رہا ہے۔ مقامی افراد کے مطابق سڑک مکمل طور پر ٹوٹ پھوٹ چکی ہے اور اس پر جگہ جگہ نوکیلے کنکر پھیلے ہوئے ہیں، جس سے نہ صرف پیدل چلنا محال ہو گیا ہے بلکہ تیز رفتار گاڑیوں کے ٹائروں سے اچھلنے والے کنکر راہگیروں کو لگنے سے روزانہ حادثات اور جانی نقصان کا خدشہ بڑھتا جا رہا ہے۔علاقہ مکینوں نے اس صورتحال پر گہری تشویش کا اظہار کرتے ہوئے کہا ہے کہ یہ سڑک مذہبی اور انتظامی لحاظ سے مرکزی حیثیت رکھتی ہے لیکن انتظامیہ کی عدم توجہی کے باعث اس کی حالت ابتر ہو چکی ہے۔ شہریوں نے وفاقی وزیر تجارت نواب جام کمال خان عالیانی، سیکریٹری پارلیمانی امور نوابزادہ میر زرین خان مگسی، چیئرمین میونسپل کمیٹی اوتھل سید سومار شاہ کاظمی اور چیف آفیسر حاجی محمد خان دودا سے پرزور مطالبہ کیا ہے کہ عوامی تکلیف کا نوٹس لیتے ہوئے سڑک کی فوری تعمیر و مرمت کے احکامات جاری کیے جائیں تاکہ حادثات کا سدباب ہو سکے اور شہریوں کو درپیش سفری اذیت کا مستقل خاتمہ ممکن ہو سکے۔

اوتھل(این این آئی) کراچی کے تھانہ سکھن کے علاقے سے چوری شدہ ٹویوٹا کرولا کار اوتھل کے علاقے وایارو سے سی آئی اے لسبیلہ نے برآمد، دو کار لفٹر گرفتار، تفصیلات کے مطابق ایس ایس پی لسبیلہ نجیب اللہ پندرانی کی جرائم پیشہ عناصر کیخلاف کارروائی کی ہدایت پر انچارج سی آئی اے پولیس لسبیلہ جان محمد جاموٹ نے اپنی پولیس ٹیم کے ہمراہ مین آر سی ڈی روڈ وایارو چیک پوسٹ اوتھل کے مقام پر دوران سنیپ چیکنگ کراچی کی جانب سے کوئٹہ جانے والی ٹو۔ڈی کرولا کار رجسٹریشن نمبر AER-518 کو مشکوک جان کر روکا۔ دریافت پر کار ڈرائیور نے اپنا نام علی رحمٰن ولد ولی رحمٰن قوم خٹک سکنہ کراچی جبکہ ساتھ بیٹھے ہوئے شخص نے اپنا نام وسیم شہزاد ولد عبدالحکیم قوم راجپوت سکنہ کراچی بتلایا۔ گاڑی کی معلومات کرنے پر پتہ چلا کہ کراچی کے تھانہ سکھن کے علاقے سے چوری ہوئی ہے۔ ملزمان نے چوری شدہ کار گاڑی قبضہ خود میں رکھ کر جرم زیر دفعہ 411-34 ت پ کا ارتکاب کیا۔ ملزمان کے خلاف مقدمہ نمبر 32/2026 درج کرکے اوتھل پولیس نے مزید تفتیش شروع کردی ہے۔