رکھنی (یو این اے )رکھنی بائی پاس پر پرانا نادرا آفس کے قریب ڈکیتی کی ایک بڑی واردات پیش آئی ہے، جہاں نامعلوم مسلح افراد نے اسلحہ کے زور پر ایک بیوپاری سے 4 لاکھ 12 ہزار روپے نقدی چھین لی۔ بتایا جاتا ہے کہ بیوپاری اپنے کاروباری معاملات کے سلسلے میں جا رہا تھا کہ اچانک مسلح ملزمان نے اسے روک کر یرغمال بنا لیا اور رقم لوٹ کر موقع سے فرار ہونے میں کامیاب ہو گئے۔اس واقعے کے بعد علاقے کے تاجروں اور عوام میں خوف و ہراس پھیل گیا ہے۔ اطلاع ملتے ہی پولیس کی نفری جائے وقوعہ پر پہنچ گئی، جس نے جائے وقوعہ سے شواہد اکٹھے کر کے ملزمان کی تلاش کے لیے ناکہ بندی شروع کر دی ہے۔ پولیس حکام کا کہنا ہے کہ واقعے کی مختلف پہلوں سے تحقیقات کی جا رہی ہیں اور جلد ہی ملزمان کو ٹریس کر کے قانون کے کٹہرے میں لایا جائے گا۔

رکھنی(یو این اے )ضلع بارکھان کی تحصیل رکھنی اور اس کے گردونواح میں زلزلے کے شدید جھٹکے محسوس کیے گئے ہیں، جس کے باعث شہریوں میں شدید خوف و ہراس پھیل گیا۔ زلزلہ پیما مرکز کے مطابق ریکٹر اسکیل پر زلزلے کی شدت 4.8 ریکارڈ کی گئی ہے۔ زلزلے کے جھٹکے محسوس ہوتے ہی لوگ خوفزدہ ہو کر اپنے گھروں اور دکانوں سے باہر کھلے مقامات پر نکل آئے۔رپورٹس کے مطابق رکھنی شہر کے ساتھ ساتھ ملحقہ دیہی علاقوں میں بھی زمین لرزنے کی اطلاعات موصول ہوئی ہیں۔ ابتدائی اطلاعات کے مطابق زلزلے کے نتیجے میں فی الحال کسی جانی یا مالی نقصان کی اطلاع نہیں ملی ہے، تاہم جھٹکے اتنے واضح تھے کہ شہریوں میں تشویش کی لہر دوڑ گئی۔ انتظامیہ اور متعلقہ ادارے صورتحال کا جائزہ لے رہے ہیں۔