رکنی(یو این اے)رکنی شہر میں چوکیدار کی بروقت کارروائی اور دلیری کی وجہ سے چوری کی ایک بڑی واردات ناکام بنا دی گئی۔ تفصیلات کے مطابق گزشتہ شب نامعلوم چور اندھیرے کا فائدہ اٹھاتے ہوئے چوری کی نیت سے شہر میں داخل ہوئے، لیکن وہاں تعینات چوکیدار عبدالرزاق نے بہادری کا مظاہرہ کرتے ہوئے انہیں چیلنج کیا۔ اس دوران ملزمان اور چوکیدار کے درمیان فائرنگ کا تبادلہ بھی ہوا، جس کے نتیجے میں ملزمان گھبرا کر بھاگنے پر مجبور ہو گئے۔واقعے کی اطلاع ملتے ہی پولیس کی نفری فوری طور پر جائے وقوعہ پر پہنچ گئی، تاہم ملزمان روپوش ہونے میں کامیاب ہو گئے۔ پولیس نے علاقے کے داخلی و خارجی راستوں کی ناکہ بندی کر کے ملزمان کی تلاش شروع کر دی ہے۔ مقامی شہریوں نے چوکیدار عبدالرزاق کی جانب سے اپنی جان خطرے میں ڈال کر عوامی مال کے تحفظ کو شدید سراہا ہے اور اسے علاقے کے لیے ایک مثالی اقدام قرار دیا ہے۔ پولیس حکام کا کہنا ہے کہ واقعے کی تحقیقات کی جا رہی ہیں اور ملزمان کو جلد گرفتار کر لیا جائے گا۔

ڈیرہ بگٹی کے علاقے سنگسیلاح اور گردونواح میں مال مویشیوں کی پراسرار بیماری کے پیش نظر محکمہ لائیو اسٹاک نے فوری اقدامات کرتے ہوئے مفت علاج اور ویکسینیشن مہم شروع کر دی۔تفصیلات کے مطابق گزشتہ روز سنگسیلاح میں مال مویشیوں کی اموات کی خبریں سامنے آنے کے بعد ڈپٹی ڈائریکٹر لائیو اسٹاک محمد کھتران نے فوری طور پر ڈاکٹرز اور عملے کو متاثرہ علاقوں میں پہنچنے کی ہدایت جاری کی۔ہدایات کے بعد لائیو اسٹاک کی ٹیمیں سنگسیلاح اور مختلف گوٹھوں میں پہنچ گئیں جہاں جانوروں کی بیماری پر قابو پانے کے لیے ہنگامی بنیادوں پر ویکسینیشن کا عمل شروع کیا گیا۔ اس دوران متاثرہ مویشیوں کا علاج بھی کیا گیا جبکہ علاقہ مکینوں کو بیماری سے بچاو¿ کے حوالے سے آگاہی فراہم کی گئی۔محکمہ لائیو اسٹاک کی جانب سے مویشی پال افراد میں مفت ادویات بھی تقسیم کی گئیں تاکہ مزید نقصانات سے بچا جا سکے۔حکام کے مطابق بروقت اقدامات سے بیماری کے پھیلاو¿ کو روکنے میں مدد مل رہی ہے اور صورتحال قابو میں ہے۔

کوئٹہ (آن لائن) حکومت بلوچستان نے رکھنی بازار کی جامع بہتری، تزئین و آرائش اور ترقیاتی منصوبے کی منظوری دے دی ہے جس کا مقصد علاقے میں معاشی سرگرمیوں کو فروغ دینا، تجارتی ڈھانچے کو جدید خطوط پر استوار کرنا اور عوام کو معیاری سہولیات کی فراہمی یقینی بنانا ہے صوبائی کابینہ کی منظوری کے بعد محکمہ سروسز اینڈ جنرل ایڈمنسٹریشن ڈیپارٹمنٹ نے اس منصوبے کا باقاعدہ نوٹیفکیشن جاری کر دیا ہے جس کے تحت متعلقہ اداروں کو فوری عملدرآمد کی ہدایات بھی جاری کی گئی ہیں تاکہ منصوبے کے ثمرات جلد از جلد عوام تک پہنچ سکیں وزیراعلیٰ بلوچستان میر سرفراز بگٹی نے کہا ہے کہ رکھنی بازار کی ترقی سے مقامی معیشت کو نئی جہت ملے گی کاروباری سرگرمیوں میں وسعت آئے گی اور تاجروں کو ایک منظم، محفوظ اور سہل کاروباری ماحول میسر آئے گا سماجی رابطے کی سائٹ ایکس پر انہوں نے کہا کہ یہ منصوبہ نہ صرف تجارتی سرگرمیوں کو مستحکم کرے گا بلکہ روزگار کے نئے مواقع بھی پیدا کرے گا انہوں نے کہا کہ صوبائی حکومت شہری سہولیات کی بہتری، بنیادی ڈھانچے کی مضبوطی اور پائیدار ترقی کے وژن پر عمل پیرا ہے عوام کو جدید تقاضوں سے ہم آہنگ سہولیات کی فراہمی اور شہروں کی منظم ترقی حکومت کی اولین ترجیحات میں شامل ہے وزیراعلیٰ بلوچستان نے کہا کہ رکھنی بازار کی اپ گریڈیشن سے علاقے کی مجموعی خوبصورتی میں اضافہ ہوگا، شہری نظم و نسق بہتر ہوگا اور عوام کے معیارِ زندگی میں نمایاں بہتری آئے گی جو ایک خوشحال اور ترقی یافتہ بلوچستان کے وژن کی جانب اہم پیش رفت ہے۔

بلوچستان کے ضلع بارکھان اور ژوب سمیت مختلف علاقوں میں زلزلے کے جھٹکے محسوس کیے گئے۔ جس سے لوگوں میں خوف و ہراس پھیل گیا۔

زلزلہ پیما مرکز کے مطابق زلزلے کی شدت 4.5، گہرائی 25 کلومیٹر ریکارڈ کی گئی، جبکہ مرکز ژوب سے 110 کلومیٹر دور جنوب مشرق میں تھا۔

زلزلے کے باعث لوگوں میں خوف و ہراس پھیل گیا اور کلمہ طیبہ کا ورد کرتے ہوئے گھروں سے باہر آ گئے تاہم  کسی جانی و مالی نقصان کی کوئی اطلاع نہیں ملی۔

بارکھان(یو این اے )ایران اور امریکہ کے درمیان جنگ بندی (سیز فائر)کے قیام کے لیے پاکستان کے مخلصانہ اور مثر کردار پر ضلع بارکھان کی عوام نے صوبائی وزیر سردار عبدالرحمن کھیتران کی اپیل پر بھرپور جشن منایا۔ اس موقع پر بارکھان کے شہریوں کا جوش و خروش دیدنی تھا، جنہوں نے بڑی تعداد میں سڑکوں پر نکل کر ڈھول کی تھاپ پر روایتی بلوچی رقص (چھاپ) پیش کیا اور اپنی خوشی کا اظہار کیا۔ سردار عبدالرحمن کھیتران کی کال پر منعقدہ اس جشن میں عوام نے فیلڈ مارشل سید عاصم منیر اور وزیراعظم شہباز شریف کی امن کوششوں کو زبردست خراجِ تحسین پیش کیا اور عالمی سطح پر پاکستان کے بڑھتے ہوئے قد پر فخر کا اظہار کیا۔جشن کے دوران بارکھان کی فضا "پاکستان زندہ باد” اور "پاک فوج زندہ باد” کے فلک شگاف نعروں سے گونجتی رہی۔ نوجوانوں نے ڈھول بجا کر اور رقص کر کے اس کامیابی کو یادگار بنایا، جبکہ بوڑھے اور بچے بھی اس جشن کا حصہ بنے۔ شرکا کا کہنا تھا کہ عالمی سطح پر امن کے قیام کے لیے پاک فوج اور حکومتِ پاکستان کا یہ اقدام قابلِ فخر ہے اور پاکستان نے ایک ذمہ دار ریاست کے طور پر اپنا لوہا منوایا ہے۔ اس موقع پر سردار عبدالرحمن کھیتران نے اس عزم کا اعادہ کیا کہ بارکھان کی عوام ہمیشہ ریاست اور افواجِ پاکستان کی پشت پر کھڑی ہے اور ملک کی سالمیت کے لیے کسی بھی قربانی سے دریغ نہیں کرے گی۔