کوئٹہ(اے اےن اےن) پاکستان یونائیٹڈ ورکرز فیڈریشن بلوچستان کے جنرل سیکرٹری و کیسکو لیبر یونین کے مرکزی صدر پیر محمد کاکڑ، جنرل سیکرٹری پاکستان یونائیٹڈ ورکرز فیڈریشن بلوچستان، گوادر فشر مین ورکر یونین کے حاجی خداہیداد واجو، یونس انور، بلوچ فشر مین محنت کش یونین اورماڑہ کے رہنما زبیر مسافر، اور صدر دی بلوچ فشرمین محنت کش اورماڑہ زبیر مسافر نے اپنے مشترکہ بیان میں کہا ہے کہ اورماڑہ کی ساحلی حدود میں ٹرالر مافیا کی بڑھتی ہوئی مداخلت اور غیر قانونی شکار نے مقامی ماہی گیروں کی زندگی اجیرن بنا دی ہے۔انہوں نے کہا کہ بڑے ٹرالرز جدید اور ممنوعہ جالوں کے ذریعے سمندری وسائل کو بے دریغ لوٹ رہے ہیں، جس کے باعث نہ صرف قیمتی آبی حیات کو شدید نقصان پہنچ رہا ہے بلکہ مقامی ماہی گیروں کا روزگار بھی تباہی کے دہانے پر پہنچ چکا ہے۔ ان کا کہنا تھا کہ غیر قانونی ٹرالنگ کے نتیجے میں غریب ماہی گیروں کے جال کٹ کر ضائع ہو رہے ہیں، ان کی کشتیاں نقصان کا شکار بن رہی ہیں اور ان کے خاندان شدید معاشی مشکلات سے دوچار ہیں۔رہنماو¿ں نے واضح کیا کہ متعلقہ اداروں کی غفلت اور مسلسل خاموشی نے ٹرالر مافیا کو مزید طاقتور اور بے لگام بنا دیا ہے، جو نہ صرف مقامی آبادی کے لیے بلکہ حکومتی رٹ کے لیے بھی ایک بڑا چیلنج بن چکا ہے۔ انہوں نے کہا کہ اگر فوری اقدامات نہ کیے گئے تو صورتحال مزید گھمبیر ہو سکتی ہے۔انہوں نے وزیراعلیٰ بلوچستان میر سرفراز بگٹی، مشیر فشریز برکت علی رند، چیف سیکرٹری بلوچستان اور دیگر متعلقہ حکام سے مطالبہ کیا کہ وہ اس سنگین مسئلے کا فوری نوٹس لیں، گوادر اور اورماڑہ کی سمندری حدود میں غیر قانونی ٹرالنگ پر سخت پابندی عائد کریں، ٹرالر مافیا کے خلاف بلاامتیاز کارروائی کریں اور متاثرہ ماہی گیروں کے نقصانات کا فوری ازالہ یقینی بنائیں۔انہوں نے متنبہ کیا کہ اگر ماہی گیروں کے حقوق کا تحفظ نہ کیا گیا تو احتجاج کا دائرہ وسیع کیا جائے گا، جس کی تمام تر ذمہ داری متعلقہ حکام پر عائد ہوگی۔

اورماڑہ (یو این اے )ساحلی شہر اورماڑہ میں آوارہ اور بیمار کتوں کی بھرمار نے شہریوں کی زندگی اجیرن کر دی ہے، جہاں گزشتہ ایک ماہ کے دوران خواتین اور بچوں سمیت 6 افراد کتوں کے حملوں کا شکار ہو کر ہسپتال پہنچ گئے۔ رورل ہیلتھ سینٹر (آر ایچ سی) اورماڑہ کے فارماسسٹ محمد حسین نے میڈیا کو تفصیلات بتاتے ہوئے تصدیق کی کہ حالیہ دنوں میں ڈاگ بائٹ کے 6 کیسز رپورٹ ہوئے ہیں، جنہیں فوری طور پر ہسپتال میں طبی امداد اور ریبیز سے بچا کی ویکسین (Anti-Rabies) فراہم کی گئی ہے۔ انہوں نے اطمینان ظاہر کیا کہ تمام متاثرین کو بروقت ویکسینیشن کے عمل سے گزار لیا گیا ہے جس سے ان کی زندگیوں کو لاحق خطرات ٹل گئے ہیں۔شہریوں کی جانب سے بڑھتی ہوئی شکایات اور خوف و ہراس کے پیش نظر میونسپل کمیٹی اورماڑہ نے باقاعدہ طور پر آوارہ اور بیمار کتوں کو ٹھکانے لگانے کی مہم کا آغاز کر دیا ہے۔ انتظامیہ کا موقف ہے کہ یہ اقدامات عوامی تحفظ بالخصوص بچوں اور بزرگوں کی سلامتی کے لیے اٹھائے جا رہے ہیں۔ دوسری جانب شہر کے سماجی حلقوں اور شہریوں نے انتظامیہ سے مطالبہ کیا ہے کہ اس مہم کو مزید تیز اور منظم کیا جائے تاکہ اسکول جانے والے بچوں کی حفاظت کو یقینی بنایا جا سکے اور شہر کو ان خطرناک کتوں سے مکمل پاک کیا جا سکے۔